Nur-Sultanda Qorǵanys ministrliginiń alqa otyrysy ótti, dep habarlaidy "Ult aqparat" vedomstvonyń baspasóz qyzmetine silteme jasap.
Qorǵanys ministri, general-polkovnik Rýslan Jaqsylyqovtyń tóraǵalyǵymen ótken alqa otyrysyna áskerdiń bas qolbasshylary, óńirlik qolbasshylyqtar áskerleriniń, ásker tekteriniń qolbasshylary, áskeri bólimder men quramalardyń komandirleri qatysty.
Otyrys barysynda qysqy oqý kezeńindegi jalpy qyzmettiń, jaýyngerlik jáne jumyldyrý daiyndyǵynyń, tyldyq jáne tehnikalyq qamtamasyz etýdiń qorytyndylary shyǵaryldy. Áskeri tártip pen quqyqtyq tártip jaǵdaiy da taldandy.
– Memleket basshysy Qarýly kúshterdi qaita formattaý, olardyń jaýyngerlik ázirligi men jaraqtandyrylýyn arttyrý jóninde tapsyrmalar berdi. Osylaisha, soǵys jaǵdaiynda da, daǵdarys ahýalynda da áreket etýge qabiletti jaýyngerlik bólimsheler qurylýda, – dedi general-polkovnik Rýslan Jaqsylyqov.
Áskerlerdiń jaýyngerlik daiyndyǵyn arttyrý jónindegi is-sharalardyń qorytyndysy týraly Qorǵanys ministriniń birinshi orynbasary – Bas shtab bastyǵy general-leitenant Marat Qusaiynov baiandady. Ol eseptik kezeńde jaýyngerlik daiarlyqtyń qarqyny edáýir artqanyn, qazirgi zamanǵy qarýly qaqtyǵystardyń tájiribesine qarap, áskerlerdi qoldanýdyń jańa nysandary men ádisteri igerilip jatqanyn atap ótti.
Otyrys barysynda Qarýly kúshterdegi áskeri tártip pen quqyq tártibi, tyldyq, tehnikalyq qamtamasyz etý jáne áskeri infraqurylymdy damytý máseleleri de qaraldy. Odan basqa Qorǵanys ministrine «Qaýipsiz el» ulttyq jobasy sheńberinde ótkiziletin qarý-jaraq pen oq-dárilerdi saqtaý obektilerin jetildirý sharalary baiandaldy.
General-polkovnik Rýslan Jaqsylyqov qatysýshylarǵa qazirgi jaǵdaida memlekettiń qaýipsizdigin qamtamasyz etý júiesindegi áskerdiń róli men alatyn orny nazarda bolýy kerek dedi. Qorǵanys vedomstvosynyń basshysy Memleket basshysynyń bastamasymen Konstitýtsiiaǵa ózgerister men tolyqtyrýlar engizý jónindegi aldaǵy referendýmnyń airyqsha mańyzdy ekenin atap ótti.
Alqa otyrysynyń sońynda Qorǵanys ministri 2022 oqý jylynyń jazǵy kezeńine arnalǵan mindetterdi aiqyndady. Asa mańyzdylar qatarynda - áskerlerdiń dalalyq daǵdysyn udaiy jetildirý, jaýyngerlik daiarlyq deńgeiin kóterý, Qarýly kúshterdiń kadrlyq quramynyń tehnikalyq jaraqtandyrylýy men sapasyn arttyrý bar.
