"SNPS-Aqtóbemunaigaz" kompaniiasynyń Aral ekologiialyq apat aimaǵynda turatyn ondaǵan jumysshysy 27 maýsym kúni Aqtóbege jinalyp, narazylyqtaryn bildirdi. Munaishylardyń aitýynsha, biyl aqpan aiynda qytailyq investorlar ekologiialyq apat aimaǵynda turatyn jumysshylardyń jalaqysyna qosymsha beriletin 50 paiyzdyq tólemdi toqtatyp tastaǵan.
- Bizge tólemniń toqtatylatyny týraly aldyn ala eskertildi. Bes kúnniń ishinde jańa kelisim shartqa qol qoimasańdar, jumystan kete berińder dedi. Moinymyzda nesiemiz ben bala-shaǵamyz bolǵandyqtan lajsyzdan qol qoiǵanbyz. Biraq jalaqymyzdyń azaiǵanynan ábden qinalyp kettik. Aqpan aiynan beri shaǵym aityp barmaǵan jerimiz joq, - deidi osy kompaniiaǵa qarasty "Oktiabr" munai gaz basqarmasynyń jumysshysy Erlan Ábdiǵalymov.
- 1997 jyly "Aqtóbemunaigazdy" qytailyq investorlar alǵan kezde jaǵdaiymyz jaqsarady dep úmittengenbiz. Biraq kútkenimizdei bolmady. Sol jyldary bizdiń jalaqymyz dollarǵa shaqqanda 600 AQSh dollaryna teń bolatyn, qazir – 300 dollar. Sol jyldary barreli 12 dollar bolǵan munai qazir 50 dollar. Biraq biz onyń igiligin kórip jatqan joqpyz, - deidi Aral ekologiialyq apat aimaǵyna jatatyn Shalqar qalasynyń turǵyny, munaishy Shamil Týhvatýllin.
Aqtóbeniń Shalqar aýdany, Qyzylorda oblysynyń Aral, Sekseýil eldi mekenderinen munai kenisherine qatynap, vahtalyq ádispen jumys isteitin bul azamattar "Aral óńirindegi ekologiialyq qasiret saldarynan zardap shekken azamattardy áleýmettik qorǵaý týraly" Zańnyń 13-babyna sáikes 2017 jyldyń aqpan aiyna deiin jalaqylaryna qosymsha tólem alyp kelgen. Jumysshylardyń aitýynsha, "SNPS-Aqtóbemunaigaz" kompaniiasynyń basshylary kompaniia tabysy azaiyp ketkenin aityp, júzdegen jumysshyǵa beriletin qosymsha tólemdi toqtatqan.
Azattyq tilshisi "SNPS-Aqtóbemunaigaz" kompaniiasynyń baspasóz qyzmetinen osyǵan orai túsinikteme berýin suraǵan bolatyn. Kompaniia bul máselege kommentarii berý úshin resmi saýal joldaýdy talap etti.
