Foto: primeminister.kz
QR Premer-Ministri Álihan Smaiylov Indýstriia jáne infraqurylymdyq damý, Ekologiia jáne tabiǵi resýrstar, Ádilet, Oqý-aǵartý, Mádeniet jáne sport ministrlikteriniń ujymdaryna jańa basshylardy tanystyrdy, dep habarlaidy "Ult aqparat" primeminister.kz saityna silteme jasap.
Úkimet basshysy Indýstriia jáne infraqurylymdyq damý ministrliginiń ujymyna Marat Qarabaevty tanystyra otyryp, onyń jańa tehnologiialar, indýstriia jáne innovatsiialyq damý salalarynda jumys tájiribesi mol, ózin maqsatqa qol jetkizýde qajetti resýrstardy jumyldyra alatyn joǵary bilikti maman retinde kórsetkenin atap ótti.
«Memleket basshysy óńdeý ónerkásibiniń ósý qarqynyn jáne qosymsha quny joǵary qaita óńdeý ónimderin shyǵarýdy yntalandyrý, sondai-aq indýstriianyń bazalyq salalaryn, logistikalyq áleýetti jáne kólik infraqurylymyn damytý jóninde mańyzdy mindetterdi belgiledi», — dedi Álihan Smaiylov.
Sonymen qatar ol geologiialyq salany damytýǵa jáne paidaly qazbalardy barlaý men óndirýge investitsiialar tartýǵa erekshe nazar aýdarý qajet ekenin aitty.
Premer-Ministr Ekologiia jáne tabiǵi resýrstar ministrliginiń ujymyna Zúlfiia Súleimenovany tanystyra otyryp, vedomstvo burynǵy ekologiialyq máselelerdi, onyń ishinde Aral teńizi men Semei óńirine qatysty máselelerdi sheshý, sondai-aq sý resýrstaryn basqarý jáne tabiǵat pen janýarlar álemin qorǵaý jónindegi mindetterge qol jetkizý boiynsha jumysty jandandyrýy tiis ekenin atap ótti.
«Iri kásiporyndardyń ziiandy qaldyqtaryn kezeń-kezeńmen tómendetýge qol jetkizý jáne olardy jańa tehnologiialardy engizýge yntalandyrý qajet, óitkeni bul azamattarymyzdyń densaýlyǵyna tikelei bailanysty», — dedi Álihan Smaiylov.
Ádilet ministrliginiń ujymymen kezdesýde Premer-Ministr jańa basshy Azamat Esqaraev pen vedomstvo qyzmetkerleri jaqynda qabyldanǵan barlyq zańdar boiynsha zańǵa táýeldi aktilerdi ázirleýdi jáne osy máselede tiisti vedomstvoaralyq úilestirýdi qamtamasyz etýi tiis ekenin aitty.
Sonymen qatar, onyń aitýynsha, normativtik-quqyqtyq aktilerdi saraptaý sapasyn arttyrý, jalpy sarapshylar qoǵamdastyǵymen belsendi ózara is-qimyl jasaý jáne «modeldik» zańdar nysanynda jańa zańnamalyq bazany qalyptastyrý boiynsha jumysty jalǵastyrý qajet.
«El Prezidenti memlekettik basqarýdyń barlyq deńgeilerinde sheshim qabyldaý protsesin jedeldetý mindetin qoiyp otyr. Mundai tásil qajetti áleýmettik jáne ekonomikalyq reformalardy jedel júrgizýge múmkindik beredi», — dedi Álihan Smaiylov.
Oqý-aǵartý ministri Ǵani Beisembaevtyń aldynda turǵan basym mindetterdi atap ótken Úkimet basshysy «Jaily mektep» ulttyq jobasyn sapaly iske asyrý, oqý oryndarynyń qaýipsizdigin qamtamasyz etý, salany oqytý men tsifrlandyrýdyń ozyq ádistemelerin engizý qajettigine nazar aýdardy.
Onyń aitýynsha, mektepke deiingi jáne mektepten tys, kásiptik bilim berý júiesin odan ári damytý qajet.
«Bilim berýdiń bastapqy kezeńderinde adami kapitaldyń jáne tutastai memleketimizdiń odan ári damýynyń negizi qalanady. Úkimet tarapynan bilim berý salasyna kóp kóńil bólinedi: muǵalimderdiń jalaqysy kóterilýde, jańa mektepter men balabaqshalar ashylýda, oqytýdyń zamanaýi formattary engizilip jatyr. Biz salanyń barlyq problemalyq máselelerin josparly túrde qarap, sheshim qabyldaýdy jalǵastyramyz», — dep Álihan Smaiylov burynǵy oqý-aǵartý ministri Ashat Aimaǵambetovke atqarǵan jumysy úshin alǵys bildirdi.
Úkimet basshysy Mádeniet jáne sport ministrliginiń ujymyna jańa basshy Ashat Oralovty tanystyra otyryp, vedomstvonyń basym mindetteri Qazaqstannyń tarihi-mádeni murasyn saqtaý jáne dáripteý, respýblikanyń halyqaralyq arenadaǵy bedelin arttyrý, sondai-aq sportty damytý tásilderin ózgertý bolyp tabylatynyn atap ótti.
«Buqaralyq sportty damytýǵa basa nazar aýdaryp, kásibi sportshylardyń jańa býynyn daiarlaý deńgeiin kóterýimiz kerek. Barlyq kúsh-jiger osyǵan jumsalýy tiis», — dedi Álihan Smaiylov.
