QR Premer-Ministri Álihan Smaiylovtyń tóraǵalyǵymen ótken Úkimet otyrysynda 2021-2025 jyldarǵa arnalǵan kásipkerlikti damytý jónindegi ulttyq jobany iske asyrý barysy qaraldy, dep habarlaidy "Ult aqparat" primeminister.kz saityna silteme jasap.
Ulttyq ekonomika ministri Álibek Qýantyrovtyń málimdeýinshe, 2021 jyly ulttyq joba aiasynda 48,8 myń jobaǵa memlekettik qoldaý kórsetildi, qyzmet kórsetý jáne óńdeý ónerkásibi salalarynda jańa biznes-ideialardy iske asyrý úshin 984 jobaǵa granttar berildi. Budan basqa, 33,4 myń adam kásipkerlik negizderin oqydy jáne 169 myńnan astam ShOB sýbektileri biznes ashý jáne ony júrgizý boiynsha konsýltatsiialyq qyzmetter aldy.
Jyl qorytyndysy boiynsha ulttyq jobanyń is-sharalaryn iske asyrý arqasynda 320 myń jańa jumys orny quryldy (jospar – 196 myń), 814 myń adamdy jumysqa ornalastyrýǵa kómek kórsetildi (jospar – 700 myń). Sonymen qatar tabysy eń tómengi kúnkóris deńgeiinen nashar aýyl halqynyń úlesi tómendedi, ShOB-tyń JIÓ-ge úlesi ósti, al ekonomikadaǵy memlekettik sektordyń úlesi 14,5%-ǵa deiin tómendedi.
Osy másele boiynsha «Atameken» UKP tóralqasynyń tóraǵasy Raiymbek Batalov, Pavlodar oblysynyń ákimi Ábilqaiyr Sqaqov, Aqtóbe oblysynyń ákimi Eraly Toǵjanov, sondai-aq Shymkent qalasy ákiminiń orynbasary Aibek Sattybaev baiandama jasady.
Premer-Ministr Kásipkerlikti damytý jónindegi ulttyq jobanyń shaǵyn biznesti sapaly damytýǵa jáne orta biznesti nyǵaitýǵa baǵyttalǵanyn atap ótti.
«Basty maqsat – halyqty jumyspen qamtyp, kásipkerlik sýbektileriniń bárine birdei, teń jaǵdai jasaý. Bul úshin memleket biznesti júrgizýdiń ashyq jáne túsinikti erejelerin qabyldap otyr», — dedi Álihan Smaiylov.
Sonymen qatar Úkimet basshysy Úkimettiń «Atameken» palatasymen birlesip, kásipkerlik qyzmet salasyna jańa retteý saiasatyn engizý boiynsha aýqymdy jumys atqaryp jatqanyn eske saldy. Atap aitqanda, adami faktorlardyń áserin barynsha azaitý úshin memlekettik baqylaýda táýekelderdi basqarý jáne baǵalaý júiesin avtomattandyrý boiynsha keshendi sharalar qabyldanýda.
«Reformany “taza paraqtan bastap” júzege asyrý biznes-ortany retteýdiń tiimdiligin arttyryp, kásipkerlerge qolaily jaǵdailar jasaidy», — dedi Premer-Ministr.
Onyń aitýynsha, biyl shaǵyn jáne orta biznestiń jalpy ishki ónimdegi úlesi 33,5%-ǵa jetti. Kásipkerlik sýbektileriniń sany – 1,4 mln. Shaǵyn jáne orta bizneste jumyspen qamtylǵandardyń jalpy sany 3,5 mln adamdy qurap otyr.
«Bizdiń maqsatymyz – kásipkerlerdiń múmkindikterin keńeitý maqsatynda osy baǵyttaǵy sapaly ózgeristerge qol jetkizý. Ulttyq jobany iske asyrý 2025 jylǵa qarai shaǵyn jáne orta biznestiń jalpy ishki ónimdegi úlesin 35%-ǵa deiin ulǵaitýǵa, 1 mln-ǵa jýyq jumys ornyn qurýǵa jáne memlekettiń ekonomikadaǵy úlesin 14%-ǵa deiin azaitýǵa múmkindik berýi tiis», — dedi Álihan Smaiylov.
Bul oraida ulttyq jobanyń kórsetkishterine sapaly jáne ýaqytyly qol jetkizýdi qamtamasyz etý úshin Premer-Ministr bizneske arnalǵan qarsy mindettemelerdi eskere otyryp, ulttyq jobanyń barlyq baǵyttary boiynsha memlekettik qoldaý sharalarynyń tiimdiligin arttyrýdy tapsyrdy.
«Kásipkerlerden jańa jumys oryndarynyń ashylýyn, turaqty jalaqynyń, zeinetaqy jarnalary men salyqtardyń ýaqytymen tólenýin, shyǵarylatyn ónim túrleriniń kóbeiýin kútemiz», — dedi Álihan Smaiylov.
Odan bólek, ákimdikterge kásip asham degen azamattarǵa jan-jaqty qoldaý kórsetý tapsyryldy: elektrmen, sýmen, jylýmen qamtamasyz etý, jol salý máseleleri boiynsha jedel sheshim qabyldaý kerek. Ulttyq ekonomika ministrligi men «Atameken» palatasyna bizneske túsetin ákimshilik júktemeni azaitý jumystaryn jalǵastyrý, sondai-aq bizneske arnalǵan mindetti talaptardy, onyń ishinde jańadan engiziletin talaptardy da qaita qaraý tapsyryldy.
«Memleket biznestiń turaqty jáne tabysty qyzmetine múddeli. Kásipkerler osyny naqty sezinýleri kerek», — dep túiindedi Premer-Ministr.
