Premer-ministr Álihan Smaiylov Qostanai jáne basqa oblystardaǵy tabiǵi órtterdiń saldaryn joiý, sondai-aq Tótenshe jaǵdailar ministrliginiń bólimsheleri men qyzmetterin materialdyq-tehnikalyq jaraqtandyrý máseleleri jónindegi keńes ótkizdi, - dep habarlaidy "Ult aqparat" primeminister.kz saityna silteme jasap.
TJM basshysy Iýrii Ilin búginde Qostanai oblysyndaǵy órtke bailanysty kúrdeli ahýal turaqtanǵanyn aitty. Ministrdiń sózinshe, eldi mekenderge qaýip tónip turǵan joq. Qyzyl jalynnyń beti qaitty, jeke oqshaýlanǵan aimaqtardaǵy órt sóndirilip jatyr. Búginde evakýatsiialanǵan azamattardyń kóbi úilerine oraldy. Sonymen qatar, birqatar basqa óńirde órt sóndirý jumystary jalǵasyp jatyr, bul jumysqa TJM men ákimdikter kúshteri men qarajaty jumyldyryldy.
Premer-ministr jaýapty memlekettik organdardyń tótenshe jaǵdailarǵa daiyndyǵyna tolyq tekserý júrgizý qajettigin atap ótti.
"Qostanai oblysyndaǵy órt azamattyq qorǵaý organdaryn, tabiǵatty qorǵaý jáne orman mekemelerin materialdyq-tehnikalyq jaraqtandyrý máselelerin jedel sheship, habarlandyrý júiesin jańǵyrtý qajettigin kórsetti", - dedi Álihan Smaiylov.
Sonymen qatar, Premer-ministr barlyq óńirdegi azamattyq qorǵaý organdary qyzmetkerleriniń jalaqysyn kóbeitý jáne basqa da áleýmettik qoldaý sharalaryn, sondai-aq Qostanai oblysyndaǵy órtti sóndirýge qatysqan qyzmetkerlerge syiaqy berý máselelerin pysyqtaýdy tapsyrdy.
Úkimet basshysynyń oiynsha, jaýapty memlekettik organdar iri TJ joiý kezindegi áreket pen ózara is-qimyl algoritmderin qaita qaraýy qajet.
"Oblystaǵy órt kezinde jaýapty laýazymdy tulǵalar tiisinshe jáne ýaqytyly áreket etpedi. Osy jaǵdai boiynsha qorytyndy jasaý kerek. Kináliler jazalanýy tiis", - dedi Álihan Smaiylov.
Óz kezeginde indýstriia jáne infraqurylymdyq damý ministri Qaiyrbek Óskenbaev Áýliekól aýylynda baspanasyz qalǵan azamattarǵa arnap 91 jańa úi salý úshin 12 gektar jer ýchaskesi bólingenin habarlady. Jalpy alańy 100 sharshy metr bolatyn bir qabatty turǵyn úiler salynady. Jer ýchaskelerine qajetti infraqurylym (sý, gaz, elektrmen jabdyqtaý) jáne kirme joldar salynady. 12 jergilikti merdigerlik uiym qurylys-montaj jumystaryn bastady.
"Qysqa deiin adamdar úilerine kirip úlgerýi úshin bul jumysty jyldam aiaqtaý kerek", - dedi Álihan Smaiylov.
Odan bólek, Premer-ministr orman sharýashylyǵy qyzmetkerleriniń jalaqysyn arttyrý boiynsha usynysty qoldap, sondai-aq orman alqabyn qalpyna keltirý boiynsha birqatar tapsyrma berdi.
