QR Premer-Ministri Álihan Smaiylov halyqqa revaktsinatsiia jasaý qarqynyn barynsha arttyrýdy tapsyrdy, dep habarlaidy QazAqparat tilshisi.
«Elorda, Almaty, Shymkent qalalarynda jáne Atyraý oblysynda koronavirýs infektsiiasymen naýqastanýdyń kúrt óskenin kórip otyrmyn. Olar «qyzyl» aimaqqa ótti. Alty óńir «sary» aimaqta tur. Bizdiń negizgi mindetimiz - epidemiologiialyq ahýaldy baqylaýda ustaý. Halyqtyń sanitariialyq-epidemiologiialyq talaptardy saqtaýy boiynsha is-sharalardy kúsheitý qajet. Densaýlyq saqtaý ministrligi, ákimdikter PTR-testileý sanyn ulǵaitsyn. Jedel monitoring júrgizip, meditsina qyzmetkerlerimen aýrýhanalarda rezervtik oryndardyń daiyndyǵyn qamtamasyz etsin. Dári-dármek pen meditsinalyq buiymdardyń jetkilikti bolýyn qadaǵalaý qajet», - dedi Álihan Smaiylov búgin Úkimet otyrysynda.
Úkimet basshysy úide meditsinalyq kómek kórsetý úshin mobildi brigadalardyń jumysyn jandandyryp, olardy tegin dári-dármekpen qamtamasyz etý kerektigin, dárihanalarda dári-dármektiń tapshylyǵyna jol bermeý sharalaryn qabyldaý qajettigin eskertti.
«Revaktsinatsiia jasaý qarqyny da óte tómen. Sondyqtan Densaýlyq saqtaý ministrligi men ákimdikterge halyqqa revaktsinatsiia jasaý qarqynyn barynsha arttyrýdy tapsyramyn. Ákimdikter bul máseleni jeke baqylaýǵa alýy tiis», - dedi Premer-Ministr.
