QR Premer-Ministri Álihan Smaiylov Ekonomikany demonopolizatsiialaý jónindegi komissiianyń kezekti otyrysyn ótkizdi, onda «Atameken» UKP-nyń munai óńdeý salasyn reformalaý jónindegi usynystary qaraldy, - dep habarlaidy "Ult aqparat" Úkimettiń resmi saityna silteme jasap.
Energetika ministri Bolat Aqsholaqov shaǵyn munai óńdeý zaýyttary shyǵaratyn ónimniń sapasyn arttyrý úshin olardy tehnikalyq retteý talaptaryn kúsheitýdi usyndy.
Sondai-aq EAEO tehnikalyq reglamentine sáikes kelmeitin munai ónimderin shyǵaratyn shaǵyn munai óńdeý zaýyttaryna salyqtyq jáne kedendik jeńildikterdi alyp tastaý qajettigi aityldy.
Budan bólek, munai óńdeý zaýyttarynan janar-jaǵarmai jóneltý kezinde temirjol qyzmetterin kórsetý turǵysynan baǵanyń negizsiz ósýin jáne jekelegen kompaniialardyń básekesiz qyzmetin boldyrmaý úshin tarifterdi tómendetý týraly da áńgime boldy.
Sonymen qatar Premer-Ministr sýbektilerdiń shekteýli tobyna jeńildikter usynbaý úshin naryqtyń barlyq qatysýshysyna MÓZ-de munai ónimderin saqtaýdyń biryńǵai reglamentin ázirleýdi mindettedi.
Munai óńdeý zaýyttarynda negizsiz óndiristik shyǵyndardy boldyrmaý maqsatynda olardyń baqylaý jáne qaýipsizdik júielerine aýdit júrgizý tapsyryldy.
«Bul baǵytta búkil tehnologiialyq protsesti qamti otyryp, baqylaýdyń tsifrlyq tehnologiialaryn engizý qajet», - dedi Álihan Smaiylov.
Jalpy, Úkimet basshysy aitylǵan usynystardy qoldap, keibireýine túzetýler engizýdi jáne olardy iske asyrý máselelerin pysyqtaýdy tapsyrdy.
Otyrys barysynda suiytylǵan gaz naryǵyn, atap aitqanda, onyń ónimin ónerkásiptik qaita óńdeýshilerge satý, sondai-aq tasymaldaý jáne saqtaý boiynsha demonopolizatsiialaý sharalary qaraldy.
Premer-Ministr ýákiletti memlekettik organdarǵa baǵalyq sóz bailasýǵa ákeletin jaǵdailardy anyqtaýdy jáne osy salaǵa qajetti naryq tetikteri boiynsha usynystar engizýdi tapsyrdy.
