Joǵary aýditorlyq palatasynyń (JAP) tóraǵasy Álihan Smaiylov "Qazaqstan temir joly" ulttyq kompaniiasynyń defoltqa ushyraýy múmkin ekenin málimdedi, dep habarlaidy "Ult aqparat" Tengrinews.kz-ke silteme jasap.
Smaiylov búgin Májiliste sóz sóiledi: JAP Qazaqstanda kólik quraldaryn damytýǵa aqsha qalai jumsalyp jatqanyn tekserdi. QTJ jumysyna toqtalǵan palata tóraǵasy kompaniia óz mindettemelerin tólei almaitynyn aitty.
"Búginde QTJ óz mindettemelerin tolyq tóleýge qabileti joq jáne kredittik táýekeldiń "qyzyl" aimaǵynda tur. Onyń 2024 jyldyń basyndaǵy qaryzy 2,9 trillion teńge bolǵan jáne ósip jatyr. Jalpy qaryzdyń 45 paiyzy nemese 1,3 trillion teńgesi buryn qabyldanǵan boryshtyq mindettemelerdi qaita qarjylandyrýǵa baǵyttalǵan", - dedi Álihan Smaiylov.
Ol qarjylyq jáne tehnikalyq jaǵdaiyn jaqsartýdyń naqty merzimderin belgilei otyryp, QTJ kompaniialar tobynyń shyǵyndaryn ońtailandyrý qajet ekenin málimdedi.
"Qarjylyq jáne tehnikalyq jai-kúidi saýyqtyrýdyń naqty merzimderin aiqyndap, QTJ kompaniialar tobynyń shyǵyndaryn ońtailandyrý qajet. Bul rette "Samuryq-Qazyna" AQ-nyń qazirgi korporativtik basqarý ádisteri men damý strategiiasy elimizdiń Ulttyq temirjol kompaniiasynyń daǵdarysyn boldyrmaýǵa qabiletsiz. Aktivterdiń jai-kúiiniń nasharlaýy, boryshtardyń ósýi jáne olardy ýaqytyly qaitarý múmkindiginiń bolmaýy basqarýdaǵy túbegeili ózgeristersiz QTJ-ny defoltqa ushyratady", - dedi Álihan Smaiylov.
