Búgin Úkimet otyrysynda QR Premer-Ministri Álihan Smaiylov birqatar óńirdiń ákimine jumysty jandandyrý qajettigin eskertti, dep habarlaidy QazAqparat.
«Ekonomikanyń naqty sektorynyń ornyqty damýynyń arqasynda biylǵy jyldyń birinshi toqsanynda jalpy ishki ónim 4,4 paiyzǵa ósti. El ekonomikasynyń ósimine negizinen óńdeýshi ónerkásip salalary áser etti. Atap aitqanda, bylǵary ónimderin óndirý 29, sýsyndar óndirisi 19, farmatsevtika 18, plastmassa buiymdaryn shyǵarý 15, kiim-keshek óndirisi 13, mineraldyq ónimder 12, mashina jasaý salasy 11, onyń ishinde avtomobil óndirisi 15, daiyn metall buiymdaryn óndirý 11 paiyzǵa ósip otyr», - dedi Úkimet basshysy.
Onyń dereginshe, taý-ken ónerkásibinde 6,1 paiyz ornyqty ósim tirkeldi.
Oǵan munai igerý kólemin 7,6, tabiǵi gazdy 8,2, metall keni men kómir óndirýdi 1,9 paiyzǵa ulǵaitý esebinen qol jetkizildi.
Qyzmet kórsetý sektorynda kólik, saýda jáne bailanys salalaryndaǵy joǵary dinamika esebinen 2,8 paiyzdeńgeiinde oń ósim baiqaldy.
Qurylys salasynda ósim 8,6 paiyzdy qurady. Qazirdiń ózinde 2,9 mln sharshy metr turǵyn úi paidalanýǵa berildi.
«Biylǵy qańtar-naýryz ailarynyń qorytyndysy boiynsha Aqmola, Almaty, Jambyl, Shyǵys Qazaqstan oblystarynda, Shymkent qalasynda jáne elordada barlyq negizgi kórsetkishter boiynsha ósim bar. Qalǵan óńirler jumysty jandandyrýy tiis», -dedi Álihan Smaiylov.
