Foto: primeminister.kz
Abai oblysynda jumys saparymen bolǵan QR Premer-Ministri Álihan Smaiylov Abaidyń «Jidebai-Bórili» memlekettik tarihi-mádeni jáne ádebi-memorialdyq murajai-qoryǵynyń ekspozitsiiasymen tanysyp, óńirdiń shyǵarmashyl ziialy qaýym ókilderimen kezdesý ótkizdi. Sondai-aq Premer-Ministr sapar barysynda birqatar irgeli meditsinalyq ortalyqtardy aralady, dep habarlaidy "Ult aqparat" primeminister.kz saityna silteme jasap.
Úkimet basshysy «Jidebai-Bórili» aýmaǵynda «Uly aqyn Abai uldarymen» eskertkishine gúl shoqtaryn qoiyp, sodan keiin murajai-qoryqtyń ekspozitsiiasymen tanysty.
Jidebai qonysy – Abai esimimen bailanysty qasietti oryndardyń biri. Uly oishyldyń ómiriniń sońǵy 10 jyly osynda ótken, ol munda 76 lirikalyq óleń, 45 «qara sózdiń» 27-sin jazǵan, M. Lermontov pen I. Krylovtyń ádebi shyǵarmalaryn aýdarǵan. Óz kezeginde Bórili – uly jazýshy ári ǵalym Muhtar Áýezovtiń balalyq jáne jastyq shaǵynyń altyn besigi. Qazirgi ýaqytta «Jidebai-Bórili» murajai-qoryǵynyń qorynda shamamen 21 600 jádiger bar, al ǵylymi kitaphanada 14 500-den astam kitap saqtalǵan.
Premer-Ministrdiń oblys ziialylarymen kezdesýi barysynda jańa bilim berý mekemelerin salý jáne jumys istep turǵan bilim oshaqtaryn damytý, mádeniet jáne óner salasyndaǵy jobalardy júzege asyrý, Shákárim Qudaiberdiulynyń 165 jyldyǵyna orai is-sharalar ótkizý máseleleri talqylandy.
Suraqtardyń birine jaýap bergen Álihan Smaiylov Abai oblysynda 300-ge jýyq mádeniet jáne óner oshaǵy bar ekenin, onda 2 myńnan astam adam jumys isteitin atap ótti. Buǵan murajailar, muraǵattar, kitaphanalar, filarmoniialar, mádeniet úileri jáne t. b. kiredi.
«Úkimet mádenietti damytýǵa úles qosyp júrgen qyzmetkerlerdiń áleýmettik jaǵdaiyn jaqsartý jóninde sharalar qabyldaýda. Ótken jyldan bastap respýblikada mádeniet qyzmetkerleriniń jalaqysyn kezeń-kezeńimen kóterý bastaldy. 2025 jylǵa qarai jalaqy eki esege artýy tiis», — dedi ol.
Sonymen qatar Premer-Ministr aldaǵy ýaqytta mektepter salýdy jalǵastyrý, stýdentterge arnalǵan bilim berý granttarynyń sanyn arttyrý, oblystyń joǵary oqý oryndaryn damytý jáne olarda jańa jataqhanalar ashý josparlaryn belgiledi. Ol bul qadamdar óńirdiń mádeni áleýetin kóterýge eleýli úles qosatynyn atap ótti.
Premer-Ministr jumys sapary aiasynda oblys turǵyndaryna mamandandyrylǵan onkologiialyq kómek kórsetetin Iadrolyq meditsina jáne onkologiia ortalyǵynyń jumysymen tanysty. Meditsinalyq mekemede ártúrli beiindegi táýlik boiy jumys isteitin statsionardyń 165 tósek-orny ornalastyrylǵan, munda sáýlelik, klinikalyq jáne radionýklidtik diagnostika bólimsheleri, endoskopiia bólimshesi jáne t. b. jumys isteidi.
«Elimizdegi jalǵyz radionýklidti terapiia bólim osy ortalyqta ornalasqan. Aýrýlardy diagnostikalaýdyń materialdyq-tehnikalyq bazasy jaqsardy. Onyń ishinde qaterli isik aýrýyn erte anyqtaý men jedel hirýrgiialyq emdeý de bar. Ortalyqqa joǵary bilikti qyzmet kórsetetin zamanaýi hirýrgiialyq korpýs qajet. Densaýlyq saqtaý ministrligi osy máseleni pysyqtaýy tiis», — dedi Álihan Smaiylov.
Sonymen qatar Úkimet basshysy Oblysty damytýdyń keshendi josparynda 400 oryndyq kópbeiindi aýrýhana, 300 oryndyq balalar aýrýhanasy, oblystyq qan ortalyǵy men Semei qalasynda eki emhana, sondai-aq óńirdiń aýyldyq jerlerinde 65 jańa alǵashqy meditsinalyq-sanitarlyq kómek kórsetý nysanyn salý kózdelip otyrǵanyn aitty.
Budan keiin Úkimet basshysy biýdjet esebinen salynyp, jyl basynda paidalanýǵa berilgen 150 oryndyq múgedekterge arnalǵan oblystyq jańa abilitatsiia jáne ońaltý ortalyǵynda boldy. Onda birneshe júzý basseini, zamanaýi sport zaly, emdik vanna, eńbek terapiia kabinetteri, arnaiy mamandandyrylǵan synyptar, kitaphana, demalys bólmeleri jáne t. b. bar.
Ortalyqta balalar men eresekterge jartylai statsionarlyq jaǵdaida keshendi meditsinalyq-áleýmettik, psihologiialyq-pedagogikalyq ońaltý júrgiziledi. Syrttan em alýǵa kelgenderge 1 aidan 6 aiǵa deiin ýaqytsha turý múmkindigi bar.
Álihan Smaiylov Memleket basshysynyń tapsyrmasymen 2025 jylǵa qarai elimizdiń 12 oblysynda árqaisysy 150 oryndyq jańa ońaltý ortalyqtaryn salý josparlanǵanyn atap ótti. Bul ońaltý kezeńinde múgedek azamattardyń ortalyqta táýlik boiy qalýyna múmkindik beredi.
«Bul ortalyqtardyń ashylýy arqyly oblys turǵyndaryna, onyń ishinde shalǵai eldi mekenderdegi halyqqa arnaiy mamandandyrylǵan áleýmettik qyzmetter qoljetimdi bolmaq», — dedi ol.
