Sloveniiada alapat órttiń taralý aimaǵynda bolǵan úsh aýyldyń halqy evakýatsiialandy. El biligi ony táýelsiz respýblika bolǵan 30 jyldan astam ýaqyt ishinde bolǵan eń iri órt ekenin aitty, dep habarlaidy QazAqparat Euronews-ke silteme jasap.
Jalyn 2 myń gektardan astam aýmaqty sharpydy. Joǵary temperatýra saldarynan Birinshi dúniejúzilik soǵys kezindegi shaiqastardan beri jerde jatqan oq-dáriler jarylǵan. Sloveniialyq órt sóndirýshilerge turǵyndar belsendi túrde kómektesýde.
Frantsiiada sońǵy kúnderi aýa temperatýrasy birshama tómendedi. Bul órt sóndirýshilerge Jirondta jalynnyń taralýyn baqylaýǵa kómektesti. Bul aimaqta órt 20 myń gektardan astam ormandy joiyp, 36 myń adamdy evakýatsiialaýǵa májbúr etti. Biraq sinoptikter demalys kúnderi eldiń batysynda taǵy da ystyq bolatynyn eskertedi.
Ispaniiada eldiń soltústigi men batysyndaǵy orman órtterin baqylaý alý áli de múmkin bolmai jatyr. Taǵy toǵyz iri oshaq bar. Vigo provintsiiasynda áskeri qyzmetkerler órt sóndirýshilerge kómekke keldi. Kúshti jel men aptap ystyq órtti óshirýge áli de kedergi keltirip jatyr. Búkil koroldik aýmaǵynda órt qaýpiniń deńgeii óte joǵary.
