«Qazaq stili» orta salmaqta úlken qaýipke uqsaidy. «Sky Sports Boxing» búgin Jánibek Álimhanulynyń jeńisinen keiin Twitter-de osylai jazdy, dep habarlaidy "Ult aqparat".
Tanymal britandyq telefranshiza «Sky Sports Boxing»-niń Twitter-akkaýnty orta salmaqtaǵy qazaqstandyq boksshy Jánibek Álimhanulynyń (10-0, 6KO) amerikalyq Rob Brantpen (26-3, 18KO) jekpe-jegine baǵa berdi.
«Álimhanuly Brantty oisyrata jeńdi. Rob Brantty altynshy raýndta «otyrǵyzyp», segiz raýndtan keiin jekpe-jekten bas tartýǵa májbúr etken soń, «Qazaq stili» orta salmaqta úlken qaýipke uqsaidy», – dep keltiredi Sky Sports Boxing jazbasyn kazproboxing Instagram-akkaýnty.
Budan bólek, vRINGe.com saity qazaq boksshysynyń aiqasyna joǵary baǵa berdi.
«Virgin Hotels, Las-Vegas, AQSh. Ortasha salmaq limitinde (72,6 kg-ǵa deiin) Qazaqstannan kelgen Jánibek Álimhanuly (10-0, 6 KO) burynǵy álem chempiony amerikalyq Rob Brantty (26-3, 18 KO) op-ońai jeńip ketti.
«Qarsylastar birazǵa deiin bir-biriniń qimylyn ańdyp júrip aldy. Brendtiń daiyndyqsyz shabýyly sol jaq búiirden tigen soqqymen aiaqtaldy. Amerikalyq qarqyn men qashyqtyqty sezine almady: djeb soqqylary durys timedi, shabýyldary da darymai, kerisinshe soqqynyń astynda qaldy.
Branttyń jattyqtyrýshysy Braian Makintair Branttan jekpe-jekti kúsheitip, qashyqtyqty qysqartýdy, birinshi nómirmen jumys isteýdi talap etti. Alaida ol bárin kerisinshe jasady – qarsylasynan qashqaqtap, aralaryn uzartyp aldy. Jekpe-jektiń bir jaqty bolǵany sonsha, ony jalǵastyrýdyń máni qalmady. Osylaisha Qazaqstanda orta salmaqtaǵy top-10 ekinshi boksshy bar. Bizdiń quttyqtaýlarymyzdy qabyl alyńyzdar!», - delingen habarlamada.
