Foto: ©️ Tengrinews.kz / Turar Qazanǵapov
Pavlodar qalasynyń irgesindegi Leninskii kenti Atameken bolyp ataldy. Kentte búginde 10 myńnan asa adam turady, - dep habarlaidy Kazinform agenttigi.
Atameken — Pavlodar qalasynyń ákimshilik aýmaǵyna enetin úlken kent. Jergilikti jurttyń teń jartysy — ózimizdiń qandastarymyz.
Jalpy, eldi meken kópultty bolǵandyqtan ba, onyń ataýyn ózgertý máselesi kópke deiin jergilikti qaýym tarapynan qarsylyqqa ushyrai berdi. Aýyl aqsaqaldary men bas kóterer azamattary birneshe márte Qazanǵap bidiń atyn bergisi kelip, usynys jasaǵanymen halqymyzdyń ótken tarihyn onsha-munsha bilmeitin jergilikti jurt bul bastamadan úzildi-kesildi bas tartty.
Al Leninskii ataýyn kartadan syzyp tastaýǵa talpynǵan qoǵam belsendileri biyl jazda kentke 6 túrli nusqa usyndy. Olar — Qazanǵap, Bidaiyq, Atameken, Yntymaq, Qazyna jáne Jetinshi aýyl. Qorytyndy jiynda Qazanǵap bi men Atameken ataýlary qalyp, jergilikti qaýymdastyqtyń 50 múshesiniń 49-y Atamekenge daýys berdi.
"Pavlodar oblysy ákimdiginiń 2023 jylǵy 28 jeltoqsandaǵy № 4 birlesken qaýlysy men Pavlodar oblystyq máslihatynyń 2023 jylǵy 28 jeltoqsandaǵy № 105/8 sheshimimen Lenin kenti Atameken bolyp qaita ataldy", — dep habarlady kent ákimdiginen.
Erterekte bul jerde Bidaiyq degen aýyl bolǵan. Ertis ózeninde kópir joq eski zamanda ózennen arly-berli ótkizetin paromdy kútetin jolaýshylar osy jerde túnep otyrǵan.
Al kent retinde negizi 1914 jyly qalanyp, № 7 aýyl qurylady. 1965 jyly proletariat kóseminiń esimi berildi. Keńes zamanynan Pavlodar qalasyna qaraityn kentke táýelsizdik jyldary aýyldardan kóp otbasylar kóship keldi.
Atameken oblys ortalyǵy úshin geografiialyq turǵydan asa mańyzǵa ie.
Aityp óteiik, Atameken kentinde shoý-bizneste Skriptonit atymen tanymal bolǵan belgili mýzykant Ádil Jálelov dúniege kelgen.
Al Atamekennen árirek 20 shaqyrym jerdegi Aqsý qalasy — taǵy bir daryndy mýzykant, Gremmi syilyǵynyń iegeri Imanbek Zeikenovtiń týǵan mekeni.
