Soltústik Qazaqstan oblysyndaǵy Politsiia departamentiniń emhanasy men gospitaline 20 myń adam tirkelgen. Olarǵa 22 medbike qyzmet kórsetip keledi, dep habarlaidy "Ult aqparat".
Búgin aq halattylardy kásibi mereke - Halyqaralyq medbikeler kúnimen tártip saqshylary jáne áriptesteri quttyqtady.
«Biyl alǵash ret bul merekeni saltanatty is-sharasyz qarsy alyp jatyrmyz. Oǵan karantindik shekteýler sebep. Tótenshe jaǵdai rejimi alynyp, karantindik shekteýler bosańsyǵanymen biz qyzmetkerlerimizdiń densaýlyǵyn qaterge tikpeýge sheshtik. Gospital men emhananyń mamandaryna onsyz da qaýipti indetti juqtyrý qaýpi basym. Qazir medbikeler karantindik is-sharalarǵa jumyldyrylǵan. Olar ákimshlik ǵimarattardyń kireberisinde politsiianyń barlyq qyzmetkerlerin tekserýden ótkizip kirgizedi. Dárigerlermen birge syrqattardy, sonyń ishinde koronavirýs juqtyrýy múmkin naýqastardy qabyldap, tiisti saraptamalardy alady. Qazirgi kezde Politsiia departamentiniń jeke quramyn tekserip jatyrmyz. Sol sebepti baǵa jetpes qyzmetkerlerimizdi jumys oryndarynda quttyqtap jatyrmyz», - deidi gospitaldiń bastyǵy Qumar Kúsemisov.
Vedomstvonyń meditsinalyq mekemesinde jumys isteitin medbikelerdiń jumysy kózge kórine bermeidi. Olar oblystyń quqyq qorǵaý organdary salasynda isteitinderdi, jaqyn týystaryn, ardagerlerdi qabyldap, qyzmet kórsetedi. Jalpy emhanaǵa 19 300 adam tirkelgen.
«Statsionarda kezekshilik etemiz, shaqyrtýlar boiynsha shyǵamyz, karantindik is-sharalarǵa qatysamyz. Ardagerlerdi de nazardan tys qaldyrmai, únemi baryp turamyz. Biraq eń basty qiyndyq jumystyń kóptigi emes. Bul jerge kelgende biz barlyq jeke máselelerimizdi, aýrýymyzdy syrtta qaldyrýymyz qajet. Naýqastardy aq nietpen qabyldap, kásibi kómek kórsetýimiz kerek», - deidi aǵa medbike Janar Qusbekova.
