SQO politseileri 12-15 qarasha aralyǵynda oblysta ótkizilgen «Mas júrgizýshi» jedel-profilaktikalyq is-sharasynyń qorytyndysyn shyǵardy, dep habarlaidy Polisia.kz.
Osy ýaqyt aralyǵynda oblys joldarynda 23 mas júrgizýshi ustaldy. Olardyń bári ákimshilik qamaqqa alynyp, kólik quralyn basqarý quqyǵynan aiyryldy. Masań kúide bolǵan zań buzýshylardyń biri «Daewoo Nexia» avtokóligimen Ǵ. Músirepov kóshesi boiyndaǵy úilerdiń aýlasynda kele jatqanda toqtatyldy. Júrgizýshiden alkogoldiń iisi shyǵyp turdy. Meditsinalyq kýálandyrý boiynsha alkogoldik masańdyqtyń ortasha dárejesin kórsetti. Onyń sondai-aq, tekseris barysynda 2017 jyly masań kúide rólge otyrǵany úshin kólik basqarý quqyǵynan aiyrylǵany anyqtaldy. Avtokóligine qaita otyrýǵa quqyq tek jeti ai buryn berilgen eken. Jazalanǵanyna bir jyl tolmaýyna bailanysty, ol júrgizýshi aldaǵy segiz jyl boiyna kólik tizgindei almaidy.
«Sondai-aq, tórt kún ishinde patrýlder buryn basqarý quqyǵynan aiyryla tura masań kúide qaita rólge otyrǵan úsh júrgizýshini toqtatty. Zań ondai azamattarǵa 5 myń ailyq eseptik kórsetkishke deiingi aiyppul salý jáne ómir boiyna basqarý quqyǵynan aiyrý jazasyn qarastyrady. Qatań sharalardyń ózektiligi aiqyn: SQO-da 10 ai ishinde túrli jol-kólik oqiǵalarynan 30 adam qaza tapty, onyń 5-i mas júrgizýshilerdiń kesirinen bolǵan. Jol-kólik oqiǵalaryna jol bermeý úshin jyl basynan jol qozǵalysy qaýipsizdigin arttyrýǵa baǵyttalǵan «Quqyqtyq tártip», «Qaýipsiz jol», «Lishennik» siiaqty segiz is-shara ótkizildi», – deidi SQO PD JPQ basqarmasynyń bastyǵy Aidyn Baimatov.
«Mas júrgizýshi» profilaktikalyq is-sharasy kezinde jol júrisi qaǵidalary boiynsha 1 763 zańbuzýshylyq anyqtaldy. Onyń ishinde, 179 júrgizýshi basqarý quqyǵynsyz rólge otyrǵan, 119-y jyldamdyq rejimin buzǵan, 30-y baǵdarshamnyń ruqsat etilmegen túsine ótse, 19-y jaiaý júrginshi jolaǵynda adamdardy ótkizbegen.
