Foto: Kazinform
Soltústik Qazaqstan oblysynda biyl jeti adam áieliniń tegine ótken, sonyń úsheýi – aýyl turǵyny. Aiyrtaý aýdanynda eki er adam jáne Qyzyljar aýdanynyń turǵyny zaiybynyń tegine tańdaý jasaǵan.
Elimizde 16 jasqa tolǵan ár adam atyn, ákesiniń atyn jáne tegin ózgertýge quqyly. Zańnamada qai kezde ózgertýge bolatyndyǵy da kórsetilgen. Máselen: óz aty, ákesiniń aty nemese tegi yńǵaisyzdyq týdyrsa, aitylýy qiyn bolsa, sondai-aq memlekettik tirkeý kezinde erli-zaiypty ortaq tegi bolýdy qalasa – ózgerte alady. Áieliniń úiinde turýdy oǵashsynyp, «kúshik kúieý» atanýdan qashatyn qazaq qoǵamy úshin bul jat bolǵanymen, byltyr elimizde 200-ge jýyq er adam zaiybynyń tegin alǵan.
Azamattyq hal aktilerin tirkeý organy byltyrǵy 1 shildeden bastap «Azamattarǵa arnalǵan úkimet» memlekettik korporatsiiasy» KE AQ qaraidy. Mamandandyrylǵan halyqqa qyzmet kórsetý ortalyǵy qyzmetkerleriniń málimetinshe, osy aralyqta SQO-da 3400-ge jýyq neke tirkelgen, al jyl basynan 1775 jup shańyraq qurdy. Nekege otyrǵandardyń 354-i – jasy qyryqtan asqandar, 127-si – 50-den assa, 60-tan asqan 71 jup nekelerin zańdastyrǵan.
Azamattyq hal aktilerin tirkeý organdarynyń málimetinshe, biyl shańyraq kótergen eń eresek kúieý jigittiń jasy 63-te bolsa, onyń qalyńdyǵy 60-qa tolǵan. Neke Aqjar aýdanynda tirkeldi.
Ulttyq statistika biýrosynyń málimetinshe, jalpy elimizde byltyr 121 myńǵa jýyq neke tirkelgen. Bul 2022 jyldan shamamen 8 myńǵa kem. Úilený kórsetkishinen 13 074 sanymen Almaty qalasy birinshi orynda tur. Odan keiin 10 392 sanymen Astana qalasy jáne 10 087 kórsetkishimen Almaty oblysy keledi.
Ajyrasýlar boiynsha, Almaty qalasy kósh bastap tur. Byltyr munda 4761 juptyń shańyraǵy shaiqalǵan, Qaraǵandy oblysynda – 3475, Astana qalasynda 3389 jup ajyrasyp ketken. SQO-da byltyr 1472 erli-zaiypty ajyrasýǵa ótinish berdi.
Buǵan deiin SQO-da biyl jylytý maýsymyna daiyndyqqa 31 mlrd teńge bólingenin jazǵan edik.
