Soltústik Qazaqstan oblysynda iz-túzsiz joǵalǵan 31 jastaǵy er adam orman ishinen tabyldy, dep habarlaidy QazAqparat.
SQO Politsiia departamenti baspasóz qyzmetiniń málimetinshe, politsiia qyzmetkerleri Taiynsha aýdanyndaǵy Dimitrovka aýylynyń 31 jastaǵy turǵynyn izdep tapty. Er adam din aman. Ol birneshe kún boiy Esil aýdanyndaǵy Torańǵul aýylynyń mańyndaǵy ormanda turǵan.
Er adamnyń joǵalǵandyǵy týraly ótinishti 30 qyrkúiek kúni onyń anasy Taiynsha aýdanynyń politsiia bólimine jazǵan. Áieldiń aitýynsha, uly 29 qyrkúiek kúni keshke VAZ-21120 avtokóligine otyryp, belgisiz jaqqa ketken.
Izdeý jumystaryna Taiynsha, Esil, Qyzyljar, sondai-aq oblystyq politsiia apparatynyń qyzmetkerleri tartyldy. Barlyq politsiia bólinisterine baǵdarlar jiberildi, sondai-aq volonterler men iri qoǵamdyq birlestikterdiń ákimshileri áleýmettik jelilerde iz-túzsiz joǵalǵan adamnyń sýretteri men belgileri bar jazbalar ornalastyrdy. Politsiia qyzmetkerleriniń, jergilikti turǵyndardyń jáne volonterlerdiń qarqyndy izdestirý jumystary nátije berdi. Jergilikti turǵyndardyń biri politseilerge Torańǵul men Iversk arasyndaǵy jolda qaraýsyz qalǵan VAZ kóligin kórgenin aitty. Avtokólik iz-tússiz joǵalǵan adamǵa tiesili bolyp shyqty. Politsiia qyzmetkerleri aýmaqty túgeldei sharlady, qyzmettik-izdestirý itteri, sondai-aq kvadrokopter paidalanyldy.
«Er adam ormannan aman-esen tabyldy. Osy kúnderi, 29 qyrkúiekten 2 qazannyń tańyna deiin ol ormanda bolǵan: shuńqyr qazyp, jerkepe qurastyryp, almamen qorektengen. Er adam týystaryna qaitaryldy, úiden ketýiniń sebepteri anyqtalyp jatyr», - deidi kriminaldyq politsiia basqarmasynyń bólim bastyǵy Seiilhan Jumaǵulov.
Jyl basynan soltústikqazaqstandyq politseiler habar-osharsyz joǵalǵandar boiynsha 323 ótinish qabyldady, onyń 318-i boiynsha búginde izdeýdegiler tabyldy.
