Soltústik Qazaqstan oblysynda dini mazmundaǵy materialdardy áleýmettik jeli arqyly taratqan turǵyn 100 myń teńge shamasynda aiyppul tólemek, dep habarlaidy "Ult aqparat".
SQO soty baspasóz qyzmetiniń málimetinshe, Petropavl qalalyq mamandandyrylǵan ákimshilik soty M. degen azamatqa qatysty ákimshilik isti qarady. Oblys ortalyǵynyń turǵyny «WhatsApp» messendjerindegi «Statýs» arqyly uialy telefonynan dini mazmundaǵy materialdardy jariialap otyrǵan. Arnaiy saraptama taǵaiyndalyp, materialdardyń din jaiynda ekendigi dáleldendi.
«QR Dini qyzmet jáne dini birlestikter týraly» Zańyna sáikes dini kitaptardy, dini mazmundaǵy aqparattyq materialdardy jáne dini buiymdardy dini bilim berý uiymdarynda, meshit-shirkeýlerde jáne jergilikti atqarýshy organdar bekitken, ruqsaty bar arnaiy oryndarda ǵana taratýǵa bolady. «WhatsApp» messendjerin kópshilik qoldanady. Jaýap berýshi M. áleýmettik jeliniń múmkindigin paidalanyp, basqalardyń nazaryna dini mazmundaǵy aqparatty usynyp otyrǵan.
Ákimshilik jaýapqa tartylǵan er adam sotta óziniń dini biliminiń joq ekendigin, dini qyzmet júrgizýge sertifikattar men ruqsat almaǵanyn, dini materialdardy taratýǵa zań boiynsha tyiym barlyǵyn bilmegenin aitty. Petropavl qalalyq mamandandyrylǵan ákimshilik soty er adamǵa 97 230 teńge aiyppul saldy.
