Soltústik Qazaqstan oblysynda kámelet jasyna tolmaǵan qyzdy zorlaǵan 5 jigitke sot úkimi shyqty, dep habarlaidy QazAqparat.
SQO qylmystyq ister jónindegi mamandandyrylǵan aýdanaralyq sotynyń málimetinshe, byltyr 11 maýsymda Petropavldaǵy demalys oryndarynyń birinde 5 jigit kámeletke tolmaǵan qyzdy zorlap, seksýaldyq sipattaǵy zorlyq-zombylyq jasaǵan. Qylmyskerlerdiń úsheýi sol kezde mas bolǵan.
Sottalýshylardyń kinási jábirlenýshiniń, kýágerlerdiń aiǵaqtarymen, saraptama qorytyndylarymen jáne basqa da dáleldemelermen anyqtaldy.
Prokýror R., S. jáne B.-ny 16 jylǵa bas bostandyǵynan aiyrýdy, M. jáne I.-ge qatysty 10 jyl bas bostandyǵynan aiyrý jazasyn taǵaiyndaýdy surady. Jábirlenýshiniń zańdy ókili prokýrordyń ustanymyn qoldady. Jalpy qylmystyń bul túrine 15 jyldan 17 jylǵa deiingi merzimge bas bostandyǵynan aiyrý túrindegi jaza kózdelgen.
Sottalýshylar óz kinásin moiyndamady jáne olardy aqtaýdy surady.
Sot mas kúide qylmys jasaýdy aýyrlatatyn jaǵdai dep tanydy, I. men M.-nyń kámelet jasyna tolmaǵanyn esepke alyp, jazany jeńildetti.
Sot R., B. jáne S.-ny 16 jylǵa bas bostandyǵynan aiyrdy. Olarǵa pedagogikalyq laýazymdardy jáne kámeletke tolmaǵandarmen jumys isteýge bailanysty laýazymdardy atqarýǵa ómir boiyna tyiym salyndy.
Al M. men I.-ge kámeletke tolmaǵandardy bas bostandyǵynan aiyrýdyń eń joǵary merzimi – 10 jyl berildi. Sondai-aq olar pedagogikalyq laýazymdardy jáne kámeletke tolmaǵandarmen jumys isteýge bailanysty laýazymdardy atqarý quqyǵynan 2 jyl merzimge aiyryldy.
Sot jábirlenýshi qyzdyń azamattyq talap-aryzyn tolyq qanaǵattandyryp, sottalýshylardan moraldyq ziian retinde 10 mln teńge óndirip alynatyn boldy.
