Soltústik Qazaqstan oblysynda tártip saqshylary «Barkoner» jedel-profilaktikalyq is-sharasy barysynda úsh sibir eligin atqan Sergeevka qalasynyń turǵynyn ustady, - dep habarlaidy QazAqparat.
SQO Politsiia departamenti baspasóz qyzmetiniń málimetinshe, óńirde 6 qańtardan beri «Brakoner» jedel-aldyn alý is sharasy ótip jatyr. Shal aqyn aýdanynda ótken reidterdiń birinde politseiler úsh eliktiń zańsyz atylǵanyn anyqtaǵan. Aýdan ortalyǵy Sergeevka qalasyndaǵy turǵyn úilerdiń birinen ettiń bir bóligi tabyldy. «Zańsyz ańshylyq» baby boiynsha qylmystyq is qozǵaldy.
Zańsyz ań aýlanǵan jerdi anyqtaý úshin tártip saqshylaryna biraz kúsh jumsaýǵa týra kelgen. Aýdannyń tabiǵatty qorǵaý politsiiasynyń inspektory, Sergeevka orman sharýashylyǵynyń direktory jáne qoryqshy kórshi aýdannan qar keshkish tehnikamen kómekke kelgen politseilermen birge aýmaqty shaldy. Nátijesinde birneshe saǵattan keiin Kókterek aýylynyń mańynda brakonerdiń ańdardy atqan jeri tabyldy. Al elikterdiń terisin olar «Jezqazǵan-Petropavl» avtojolynyń boiyna tastap ketipti.
«Zańsyz ań aýlady» degen kúdikpen Sergeevka qalasynyń 1988 jylǵy turǵyny ustalyp, sottyń sheshimimen qamaýǵa alyndy. Aýdan ortalyǵyndaǵy birneshe úiden eliktiń etteri alynyp, «Yamaha» qar keshkishi, «VAZ 21213» avtokóligi jáne birneshe qarý-jaraq tárkilendi.
«Zańsyz ań aýlaýǵa qatysty qylmystyq zańnamada jaýapkershilik kúsheitildi. Aiyppul mólsheri 160-tan 3000 AEK deiin ulǵaityldy. Endi 200 saǵatqa emes, 800 saǵatqa deiin qoǵamdyq jumysqa tartylady. Buryn eń qatań shara – 50 táýlikke deiin qamaýǵa alynatyn, al shetel azamaty bolsa 5 jylǵa deiin elden shyǵarylatyn. Qazir brakoner 3 jylǵa deiin bas bostandyǵynan aiyrylýy múmkin. Al zańsyz ań aýlaýǵa top bolyp shyǵyp, asa iri kólemde shyǵyn keltirgende nemese sottyń ań aýlaýǵa tyiymy bolǵan jaǵdaida qylmyskerlerge 10 jylǵa deiin jaza kesiledi», - deidi SQO PD JPQB tabiǵatty qorǵaý politsiia toby bastyǵynyń mindetin atqarýshy Asqat Qojabaev.
«Brakoner» jedel-aldyn alý is-sharasy bastalǵaly oblys politseileri zańsyz ań aýlaýdyń úsh deregin anyqtady. Ańshy myltyǵyn ruqsatsyz saqtaǵany jáne aǵashty zańsyz keskeni úshin 6 ákimshilik is sotqa joldandy. Jeti kýb metr aǵash, 6 sibir eliginiń eti, qar keshkish mashina, 2 avtokólik, 4 myltyq jáne traktor tárkilendi. Barlyǵy 185 zań buzýshylyq anyqtalsa, onyń 98-i ań aýlaý erejelerin buzýǵa qatysty. Operatsiia 5 aqpanǵa deiin jalǵasady.
