Soltústik Qazaqstan oblysynda probatsiia qyzmetiniń inspektoryna para bergen sottalýshy endi úlken mólsherde aiyppul tóleýi nemese 5 jylǵa deiin bas bostandyǵynan aiyrylýy múmkin, dep habarlaidy QazAqparat.
SQO boiynsha qylmystyq atqarý júiesi departamenti baspasóz qyzmetiniń málimetinshe, Petropavl qalasynyń probatsiia qyzmeti bólimine jazasyn óteý úshin K. esimdi sottalýshy jiberilgen.
Oǵan QR QK 296-baby 2-bóligi «esirtki quraldaryn, psihotroptyq zattardy, sol tektesterdi ótkizý maqsatynsyz zańsyz daiyndaý, qaita óńdeý, satyp alý, saqtaý, tasymaldaý» boiynsha 80 saǵattyq qoǵamdyq jumys túrinde jaza kesilgen.
Alaida Petropavl turǵyny qoǵamdyq jumys isteýden úzildi-kesildi bas tartqan.
Jumys kúniniń sońynda saǵat 19.00 shamasynda ol probatsiia qyzmeti bólimine kelip, qoǵamdyq jumysty oryndaýdan bosatyp, osy máseleni sheshýde kómektesýi úshin inspektorǵa para usynǵan.
Sottalǵan problemasyn birneshe ret osylai sheshýge tyrysqandyqtan, probatsiia qyzmeti bóliminiń inspektory onyń usynysyna keliskendei syńai tanytyp, bul jaiynda departamenttiń ózindik qaýipsizdik tobyna habarlady.
Jedel is-shara barysynda sottalǵan kabinette probatsiia qyzmetiniń inspektoryna 30 myń teńge somasynda para berip jatqan jerinde ustaldy.
Atalǵan fakti boiynsha qylmystyq is qozǵaldy.
Qazirgi ýaqytta tergeý amaldary júrgizilýde, sottalǵan K-ǵa paranyń 20-30 eselengen mólsherinde aiyppul salynbaq nemese bes jylǵa deiingi merzimge bas bostandyǵynan aiyrylýy múmkin.
