Soltústik Qazaqstan oblysynda koronavirýs anyqtalǵan patsient Reseidiń Omby qalasynan poiyzben kelgen. Bul týraly «Habar 24» telearnasynyń tikelei efirinen Soltústik Qazaqstan oblystyq densaýlyq saqtaý basqarmasynyń basshysy Timýr Sultanǵaziev aitty, dep habarlaidy "Ult aqparat".
«Soltústik Qazaqstan oblysynda koronavirýs infektsiiasynyń bir jaǵdaiy naqtylandy. Patsient - 1993 jyly dúniege kelgen Petropavl qalasynyń turǵyny. Reseidiń Omby qalasynan kelgen. Sol qalada bilim alyp júrgen. 23 naýryz kúni keshkisin tranzittik poiyzben kelgen. Tyǵyz qarym-qatynasta bolǵan tulǵalardyń barlyǵy anyqtalyp, karantinge alyndy. Patsient vokzaldan úiine barǵan, kóshege shyqpaǵan jáne tek anasymen ǵana tyǵyz bailanysta bolǵan. Kelesi kúni, 24 naýryzda dene qyzýynyń 37,6 gradýsqa kóterilýine shaǵymdanyp, jedel járdem kómegine júgingen. Jedel járdem brigadasy Reseidegi epidemiologiialyq jaǵdaidy eskere otyryp, patsientti tolyqtai qorǵanys zattarymen oqshaýlap, provizorlyq statsionarǵa jetkizdi», - dedi ol.
Basqarma basshysynyń aitýynsha, patsientten alynǵan synama onyń koronavirýs juqtyrǵanyn anyqtap otyr. Qosymsha saraptama jasaý úshin naýqas synamasy Almatydaǵy zerthanaǵa da jiberildi.
«Búgingi kúni patsienttiń jaǵdaiy birqalypty. Dene qyzýy, shaǵymy joq. Onymen bailanysta bolǵandar, onyń ishinde poiyzdaǵy jolaýshylardyń barlyǵy karantindik statsionarǵa oqshaýlandy. Zerthanalyq synama alyndy. Barlyǵynyń jaǵdaiy qanaǵattanarlyq», - dedi Timýr Sultanǵaziev.
