Foto: instagram.com/qnet_kazakhstan
Soltústik Qazaqstan oblysynda Qnet qarjy piramidasynyń bólimshesin uiymdastyrǵandar ustaldy. Olar osy zańsyz kásipke deiin ishki ister organdarynda jumys istegen, dep habarlaidy "Ult aqparat".
Tergeý materialdaryna sáikes, 2018 jyly bólimsheni uiymdastyrǵandardyń bireýi Qnet halyqaralyq kompaniiasynyń saitynda tirkelip, táýelsiz ókildiń kýáligin alǵan. Odan keiin oblysta qarjy piramidasynyń qurylymdyq bólimshesin ashqan.
"Olar Malaiziiada tirkelgen Qnet halyqaralyq kompaniiasynyń ónimderin satamyz dep, óz qylmystyq áreketterin iske asyrǵan. Birlesken qyzmetke qatysý úshin aldymen 600-800 myń teńge tóleý talaby bolǵan. Sonda táýelsiz ókildiń kýáligi jáne saiahatshynyń kartasy berilgen. Oǵan qosa, keńseni jaldaý aqysyna 40 myń teńgeden jinalyp turǵan", - deidi ekonomikalyq tergeýler departamentiniń mamandary.
Kompaniia ókilderi dál sol keńsede san alýan kezdesýler, oqytý seminarlaryn, dárister men nasihat jumystaryn júrgizgen.
Osy ýaqytqa deiin 73 salymshy anyqtaldy. Olardyń bári 82 million teńge kóleminde qarjy salǵan. Qylmystyq top úsh jyl boiy halyqty aldaǵan.
"Uiymdastyrýshylardyń qatarynda ishki ister organdarynyń burynǵy qyzmetkerleri de bolǵan. Olar halyqtyń senimin paidalanyp, qarjy piramidasyna adam tartqan. Qazirgi kezde qylmystyq istiń úsh figýranty ustaldy. Úsheýi de ýaqytsha qamaý izoliatoryna toǵytyldy", - delingen resmi habarlamada.
Qylmystyq kodekstiń 217-baby, 3-bóligi (Qarjylyq (investitsiialyq) piramidany qurý jáne oǵan basshylyq etý, qylmystyq top jasaǵan áreket, asa iri mólsherde) boiynsha sotqa deiingi tergeý sharalary bastaldy. Osy qylmys úshin bes jyldan on eki jylǵa deiingi merzimge bas bostandyǵynan aiyrý jazasy qarastyrylǵan. Kináli adamdardyń múlki tárkilenedi.
