Soltústik Qazaqstan oblysynda 200 myń teńge para aldy degen kúdikpen ustalǵan densaýlyq saqtaý basqarmasy bastyǵyna qatysty sot úkimi shyqty. Eks-sheneýnikke para berýshi de jazalandy, dep habarlaidy QazAqparat.
Petropavl qalalyq sotynda para aldy dep kúdiktelgen Soltústik Qazaqstan oblysy densaýlyq saqtaý basqarmasy basshysy Qabdrahman Saqtaǵanov pen oǵan para berdi dep ustalǵan «Densaýlyq» jeke kommertsiialyq emes mekemesiniń direktory Ainagúl Qarabaevanyń isi qaralyp, sońǵy núktesi qoiyldy. Meditsina qyzmetkerleri sybailas jemqorlyqpen osydan shamamen bir ai buryn ustalǵanymen, istiń mán-jaiy osy kúnge deiin belgisiz bolyp keldi.
Paranyń mólsheri – 200 myń teńge. «Densaýlyq» mekemesiniń direktory osynshama qarajatty basqarma basshysynyń kabinetine aparyp bergen. Tergeý barysynda bul qarajattyń oń sheshim qabyldanýy úshin usynylǵany anyqtaldy. Qarabaeva mekemesine jańadan kelgen úsh jas mamanǵa osylaisha áleýmettik tólem jasatpaq bolǵan. Óitkeni máslihattyń sheshimimen ústemaqy tek memlekettik mekemelerge ornalasqan mamandarǵa ǵana tiesili.
«Mekeme direktory basqarma bul máseleni sheshýde qoldaý kórsetýi úshin hat jazǵan. Keiin másele oń sheshilýi úshin Saqtaǵanovtyń kabinetine kelip, jumys papkalarynyń birine 200 myń teńge salynǵan konvertti salǵan jáne ony óziniń zańǵa qaishy áreket jasap jatqanyn eskertken. Saqtaǵanov konvertten 200 myń teńge kólemindegi aqshany alyp, ony óz ámiianyna salǵan, osylaisha óz menshigine ainaldyrdy», - deidi SQO prokýratýra basqarmasynyń aǵa prokýrory Asylbek Qońyratov.
Sybailas jemqorlyqqa qarsy qyzmet basqarma basshysyn sol kúni úiine kelgesin ustady. Para alýshy da, ony berýshi de óz kinásyn moiyndady.
Petropavl qalalyq sotynyń sýdiasy Dinara Baizaqova Qabdyrahman Saqtaǵanovke 5 mln 807 myń teńge mólsherinde aiyppul saldy. Buǵan deiin úi qamaqta otyrǵan eks-sheneýnik eshqaida ketpeý jónindegi qolhatpen bosatyldy. Al Ainagúl Qarabaevaǵa 4 mln teńge aiyppul salyndy. Ekeýi de ómir boiyna laýazymdy qyzmetke ornalasý quqyqtarynan aiyryldy.
Qabdrahman Saqtaǵanov vedomstvony 2010-14 jyldar aralyǵynda basqardy. Ekinshi ret byltyr shilde aiynda taǵaiyndalǵan edi.
