Soltústik Qazaqstan oblysynda aiaǵyna shege kirip ketken er adam sirespeden qaitys boldy, dep habarlaidy QazAqparat.
SQO sanitariialyq-epidemiologiialyq baqylaý departamenti basshysynyń orynbasary Arman Kúshbasovtyń aitýynsha, oqys oqiǵa Ǵ.Músirepov aýdanynda bolǵan. Jergilikti sanitariialyq qyzmetke Novoishimka eldi mekeninde 1967 jyly týǵan adamnyń sirespe aýrýyn juqtyrýy múmkin degen jedel habarlama túsedi.
Epidemiologiialyq tergeý kezinde syrqattyń Ózbekstan azamaty ekendigi anyqtaldy. Aýdanǵa ol byltyr jumys boiynsha, qurylysty júrgizýge kelgen eken.
«Syrqattyń qasynda bolǵan adam onyń 21 tamyz kúni qurylysta oń aiaǵyna tat basqan shege kirgizip alǵanyn aitty. 25 tamyz kúni keshki saǵat 22.00-den keiin aýrýy ýshyǵyp, basy keikiip, jaǵy qurysyp qalǵan. Ol kúni meditsinalyq kómek suramaǵan.
26 tamyz kúni jaǵdaiy jaqsarmaǵannan keiin ǵana jedel járdem shaqyrtqan. Naýqas birden aýdandyq aýrýhanaǵa jetkizildi. Jaǵdaiy nashar boldy, aýrý búkil omyrtqasyna tarap úlgergen eken. Oǵan «sirespe» diagnozy qoiyldy», - deidi Arman Kúshbasov.
Mamannyń aitýynsha, syrqatqa birden sirespege qarsy vaktsina qoiylǵan. Alaida kesh qaralǵandyqtan, em-dom kómektespedi. 28 tamyz kúni er adam qaitys boldy.
«Er adam 21 tamyz kúni jaraqat alyp, tek 5 kúnnen keiin ǵana dárigerlerdiń kómegine júgingen. Osylaisha ýaqytty ótkizip alǵan. Eger de ol birden aýrýhanaǵa kelip, vaktsina alǵan jaǵdaida aman qalar edi. Sol sebepti turǵyndardy mundai jaǵdailarǵa beijai qaramaýǵa shaqyramyz. Óitkeni osy sirespe siiaqty aýrýlar tek der kezinde vaktsina qoiý arqyly ǵana emdeledi», - deidi sanitar dáriger.
Sirespe – Clostridium tetani sporasynyń bakteriialary týdyratyn infektsiialyq aýrý. Ol barlyq jerde: qorshaǵan ortada, ásirese, topyraqta, jan-janýardyń tezeginde, kúlde, teriniń ústinde, tat basqan qural-saimandarda, sonyń ishinde shege, ine, sym jáne taǵy basqalarynda bolady. Infektsiia ystyqqa jáne kóptegen antiseptikterge tózimdi. Sondyqtan sporalary jyldar boiy saqtalýy múmkin.
«Sirespemen kez-kelgen adam aýyrýy múmkin. Alaida kóp jaǵdaida ony vaktsina almaǵandar juqtyrady. Bul infektsiianyń inkýbatsiialyq kezeńi 3-ten 21 kúnge deiin. Alaida ádette eki aptaǵa sozylady. Negizgi belgileri: jaǵy qarysyp, aýzyn asha almai qalady, bulshyqetteri qarysyp aýyrady, jutýy qiyndaidy, denesi qatty qaltyrap, basy aýyrady. Ystyǵy kóterilip, ter qysady, júrek soǵysy kúsheiip, qan qysymynyń kórsetkishteri ózgeredi», - deidi Arman Kúshbasov.
Sirespeden saqtanýdyń jalǵyz joly – vaktsina alý. Elimizde aýrýǵa qarsy 16 jasqa deiin 6 ekpe jasalsa, keiin vaktsina ár 10 jyl saiyn qoiylady.
