Soltústik Qazaqstan oblysynda sybailas jemqorlyqqa qarsy qyzmet memlekettik satyp alý júiesine monitoring júrgizip, 600 mln teńge biýdjet qarajatyn tiimsiz paidalanýdyń jolyn kesti, dep habarlaidy QazAqparat.
SQO Sybailas jemqorlyqqa qarsy qyzmetiniń málimetinshe, departament satyp alýdyń biryńǵai terezesi portaly arqyly memlekettik satyp alý júiesine turaqty negizde monitoring júrgizip turady.
Biyl osyndai qadaǵalaýdyń nátijesinde josparlanǵan satyp alý baǵasyn kóterýdiń 32 faktisi anyqtaldy, ol boiynsha 24 memlekettik organda baǵany tómendetý boiynsha sharalar qolǵa alyndy.
Máselen, oblystyq ftiziopýlmonologiia ortalyǵynyń basshylyǵy departamenttiń usynym hatynan keiin jalpy somasy 150 mln teńgege 100 myń respirator satyp alýdan bas tartty.
Aita ketý kerek, bir jeke qorǵanys quralynyń ortasha baǵasy - 493 teńge.
«Departamenttiń sarapshylary onlain rejiminde memlekettik satyp alý kezinde sybailas jemqorlyq táýekelderin anyqtaidy. Bul portaldyń basty artyqshylyǵy – avtomatty túrde basqa aimaqtarmen salystyrǵanda tapsyrys berýshilerdiń baǵasy qanshalyqty joǵary ekenin kórsetedi. Ortasha, qalypty baǵalardyń shaǵyn «dálizi» alynady. Usynys hattarda biz osy portaldan alynǵan málimetterdi kórsetemiz, tapsyrys berýshige qandai baǵa eń tómen, al qaisysy joǵary ekeni túsinikti bolady», - dedi SQO Sybailas jemqorlyqqa qarsy qyzmet basshysynyń birinshi orynbasary Nurlan Jahin.
Nurlan Jahin qate málimetter jii kezdesetinin atap ótti.
«Petropavl qalasynyń áleýmettik beiimdeý ortalyǵy 17 776 750 teńgege bir kg makaron satyp alýdy josparlaǵan. Sybailas jemqorlyqqa qarsy qyzmettiń aralasýynan keiin kelisin 250 teńgemen jalpy somasy 23 250 teńgege makaron ónimderin satyp alý týraly sheshim qabyldandy. Sondai-aq, Aqjar aýdany Aisary aýyldyq okrýgi ákimi apparaty 48,1 mln teńgeni tiimsiz jumsamaq bolǵan. Memlekettik organ aldaǵy jylytý maýsymyna tonnasyn 933 812 teńgemen 52 tonna kómir satyp alýdy josparlaǵan», - deidi Nurlan Jahin.
