Petropavldaǵy infektsiialyq statsionarlarda em alyp jatqandardyń ortasha jasy – 60-tan asqandar. Qosymsha dertteri bar bul naýqastardyń shamamen ár onynshysy jansaqtaý bóliminen ótedi, dep habarlaidy QazAqparat.
Petropavl qalalyq kópsalaly aýrýhananyń bas dárigeri Janna Maýytovanyń aitýynsha, «Ózińizdi kútińiz, jaqynyńyzǵa janashyr bolyńyz!» dep bekerden aitylmaǵan. Aýrýhana janynan ashylǵan infektsiialyq statsionarda em alyp jatqan aýyr haldegi naýqastardyń ortasha jasy – 60-65 aralyǵynda. Bul adamdardyń qosymsha túrli dertteri bar. Qant diabeti, arteriialyq gipertenziia, júrek aýrýlary – munyń bári koronavirýs juqqan kezde asqynyp ketedi.
«Koronavirýs infektsiiasy áli kúnge tolyq zerttelip bolǵan joq. Bul aýrýmen kúreske biz árine shilde aiymen salystyrǵanda, qazir aitarlyqtai daiynbyz. Tájiribe jinadyq. Búkilálemdik densaýlyq saqtaý uiymynyń ádistemelik usynystaryn, elimizde ázirlengen emdeý protokoldaryn nazarda ustap otyramyz. Biz qazir bul aýrýmen kúreske daiynbyz», - deidi Janna Maýytova.
Petropavl qalalyq kópsalaly aýrýhana janynan maýsym aiynda infektsiialyq bólim ashyldy. Ol bastapqyda provizorlyq statsionar qyzmetin atqardy.
«KVI-men bailanysty qazirgi jaǵdaida 15 qyrkúiekten bastap 100 orynǵa shaqtalǵan bizdiń bólim infektsiialyq statsionarǵa aýystyryldy. Ol koronavirýs juqtyrǵan jáne qaýipti infektsiia juqtyrý kúdigi bar syrqattardy qabyldaidy. Jansaqtaý, qarqyndy emdeý palatalary da ashylǵan. Jalpy statsionar ashylǵaly 1 myńnan astam adam em aldy. Olardyń 9,5 % jansaqtaý bóliminen ótti», - deidi aýrýhananyń bas dárigeri.
Mamannyń aitýynsha, ázirge infektsiialyq statsionarda jumys qalypty. Syrqattardyń kúrt ósýi baiqalmaǵan.
«Bastapqyda halyqtyń bul aýrý jaiynda túsinigi az boldy, tipti keibireýleri senbedi de. Sol sebepti oiyn-toilar, túrli jiyndar eskertýlerge qaramastan uiymdastyrylyp keldi. Qazir mundai jaǵdai anaǵurlym azaidy. Jalpy infektsiia degenimiz – aýrýdyń bir adamnan birneshe adamǵa juǵýy. Eger de biz bul tizbekti toqtata alsaq, ári qarai taralýyna jol bermesek, aýrýmen kúres nátijeli bolady», - deidi Petropavl qalalyq kópsalaly aýrýhananyń bas dárigeri Janna Maýytova.
