Petropavldaǵy temirjol tuiyqtarynyń birinde búgin 100-den astam júk kóligi jinalyp qaldy. Óńirde birneshe kúnnen beri kómir bolmaǵan, dep habarlaidy QazAqparat.
Soltústik Qazaqstan oblysynda biyl qys bastalǵaly turǵyndar kómir tapshylyǵyn kórip otyr. Óńirge ákelingen qatty otyn qajettilikti tolyq ótemeidi. Saldarynan temirjol tuiyqtarynda uzyn-sonar kezek. Kei kólik júrgizýshileri bos qaitpaý úshin kezekke tańsáriden kelip turady eken.
«Tańǵy saǵat 6.00-de keldim. Men kelgende bul jerde biraz mashina turdy. Bilmeimin, ala alam ba, joq pa? Bir aptadan artyq kómir bolǵan joq», - deidi Petropavl turǵyny Oleg Ivanov.
Búgin oblysqa 7 vagonmen 490 tonna «shubarkól» kómiri jetkizildi. Kóptiń kútkeni de osy otyn. Bir kólikke 5 tonnadan artyq artylmaidy.
«4 aqpannan beri óńirge «shubarkól» kómiri jetkizilmedi. Sol sebepti búgin osyndai uzyn kezek týyndaǵan. Qazir jolda 980 tonna «qarajyra» jáne 1190 tonna «shubarkól» kómiri kele jatyr. Budan basqa oblysqa kómir jetkizýshi aqpan aiyna 100 vagon kómirge 7 myń tonnaǵa tapsyrys berdi. Onyń 30 vagony keldi. Qatty otyn jylytý maýsymy aiaqtalǵanǵa deiin ákelinip turady», - deidi SQO energetika jáne turǵyn úi-kommýnaldyq sharýashylyǵy basqarmasynyń basshysy Baqyt Iliiasov.
Mamandardyń aitýynsha, búgin tańerteń Petropavldyń temirjol tuiyqtarynda 1830 tonna kómir boldy. Onyń 140 tonnasy Ekibastuz kómiri, 1200 tonnasy – Maikóbeniki. Qalǵany suranysqa ie – Shubarkóldiki. Baǵa ósken joq, sapasyna qarai 9-15 myń teńge aralyǵynda.
