Soltústik Qazaqstan oblysy Taiynsha aýdanyndaǵy «Obýhovskii ken-baiytý kombinaty» JShS aýmaǵynda byltyr bolǵan tóbeleske qatysty úkim shyqty, dep habarlaidy "Ult aqparat".
Esterińizge salaiyq, byltyr maýsym aiynda Taiynsha aýdanyndaǵy «Obýhovskii ken-baiytý kombinaty» JShS aýmaǵyna 30 shaqty adam kelip, basyp kirmek bolady.
Kásiporyn qyzmetkerleri olarǵa toitarys berip, saldarynan 10 adam túrli jaraqat aldy.
Taiynsha aýdandyq № 2 soty qylmystyq isti qarap, ozbyrlyq kórsetken jeti adamǵa qatysty úkim shyǵardy.
Taiynsha aýdandyq № 2 sotynyń málimetinshe, sottalýshy K.V. Saverskii «Tiolain» JShS direktorynyń orynbasary bolyp taǵaiyndalǵan.
Biraq ony kásiporyn aýmaǵyna kirgizbegendikten, quryltaishylardyń bir bóligi óz jáne JShS atynan sotqa shaǵymdanǵan.
Sot JShS quryltaishysy V.I. Dolgalevtiń, JShS burynǵy direktory T.E.Almasbaevtyń, «Stal KZ» JShS kúzet kásipornynyń jáne «Obýhov ken-baiytý kásiporny» JShS Saverskiidi kásiporyn aýmaǵyna kirgizbeýin zańsyz dep tabady.
Alaida, Saverskii sot úkiminiń zańdy kúshine enýin kútpei, ózi jaldaǵan kúzet agenttiginiń qyzmetkerleri M.J. Keńesbai, E.K.Maidanov, S.T. Medeýbaev, A.G. Bahtybaev, D.K. Japparov jáne K.N. Sekenovpen ken-baiytý kombinatynyń aýmaǵyna zańsyz túrde kúsh qoldaný arqyly kirmek bolǵan.
Olardyń kinási zardap shegýshilerdiń, kýágerlerdiń túsiniktemesimen jáne saraptama qorytyndysymen tolyq dáleldendi.
Keńesbai, Maidanov, Medeýbaev, Bahtybaev jáne Japparov óz kinásin moiyndady.
Sot úkim shyǵarý barysynda olardyń buryn sottalmaǵanyn esepke alyp, árqaisysyn 1 jyl 6 aiǵa bas bostandyǵynan aiyrdy.
Qylmysty uiymdastyrǵan Saverskii 2 jylǵa sottaldy. Ol jazasyn qylmystyq-atqarý júiesiniń qaýipsizdik deńgeii tómen mekemesinde ótkeredi.
Al tóbeles barysynda pyshaq qoldanyp, kásiporyn qyzmetkerleriniń birin jeńil jaralaǵan Sekenov 1 jyl 6 aidy koloniiada ótkizedi.
Sondai-aq sottalǵandar moraldyq ziian keltirgeni úshin zardap shekkenderge ótemaqy tóledi.
