Soltústik Qazaqstan oblysynda sanitar dárigerler monitoring aiasynda et ónimderiniń synamasyn alyp, «halal» shujyqtar men konservilerden shoshqa etin tapty, dep habarlaidy QazAqparat.
SQO boiynsha QR DSM SEBK Ulttyq saraptama ortalyǵy synaq zerthanasynyń málimetinshe, mamandar naýryz aiynda halyq tutynatyn taýarlar sapasynyń monitoringi aiasynda satylymdaǵy et ónimderinen 38 synama satyp aldy.
Zertteý barysynda eki túrli siyr konservisinen jáne shujyqtyń bir synamasynan sáikessizdikter anyqtaldy, iaǵni «halal» belgisi bar bul ónimderden shoshqanyń DNK-sy tabyldy.
Onyń barlyǵy Reseide ázirlengen, sonyń ishinde Bashqurtstan Respýblikasy «Pavlov A.S.» JK-niń jartylai ystalǵan «Mýsýlmanskaia» shujyǵy, «Standart» Kýrganskii miasokombinat» JShQ-niń «Joǵary surypty buqtyrylǵan siyr eti» jáne «Orelprodýkt» AQ-nyń «Joǵary surypty buqtyrylǵan siyr eti» sterildengen kesek etti konservileri bar.
«Sondai-aq, quramynda eti bar, tartylǵan et salynǵan «Túski astyq dońyz eti» konservisinen taýyq DNK-sy tabyldy. Bul ónim Máskeý oblysy, «Seliatino» et óńdeý zaýytynda shyqqan. Bul ónimder talapqa sai kelmeýine bailanysty sáikes kelmeitin ónimder tizilimine engizildi», - delingen baspasóz habarlamasynda.
«Ulttyq saraptama ortalyǵy» SQO filialy mamandarynyń aitýynsha, óndirýshiler tamaq ónimderin tańbalaý boiynsha da birqatar zań buzýshylyqtarǵa jol bergen, onyń ishinde zattańbada kórsetilgen sipattamalar is júzinde quramymen sáikes kelmeitindigi anyqtaldy.
