Soltústik Qazaqstan oblysynda zamanǵa sai kelmeitin, ideologiialyq turǵydan eskirgen eldimeken jáne kóshe ataýlary ózgertilmek, dep habarlaidy "Ult aqparat".
Qazir Aqjar aýdanyndaǵy 1 aýyldyq okrýg pen 2 eldi mekenniń ataýyn ózgertý máselesi ashyq normativtik-quqyqtyq aktiler internet portalynda halyq talqysyna túsken.
«Byltyr Aqjar aýdanynda Novosel aýyldyq okrýgin, Kommýnizm jáne Kievskoe atalǵan eldimekenderdiń ataýlaryn ózgertý boiynsha turǵyndarmen jiyndar ótkizilip, jergilikti halyq olardy qaita ataý boiynsha usynysty maquldap, qujat oblystyq onomastikalyq komissiiaǵa joldandy. Biyl tamyz aiynda oblystyq onomastikalyq komissiia Novosel aýyldyq okrýgin, Kommýnizm jáne Kievskoe eldimekenderiniń ataýyn ózgertýdi qoldady.
Aqjar aýdanyndaǵy Novosel aýyldyq okrýgine Úlken qara oi okrýgi degen ataý qoiý usynylyp otyr. Al Kommýnizm aýylyn Baimyrzaǵa aýystyrý jáne Kievskoe eldi-mekenine Kishi qara oi atyn berýdi josparlanyp otyr», - deidi SQO ákimdiginiń mádeniet, arhivter jáne qujattama basqarmasynyń bólim basshysy Erniiaz Sultanov.
Onomastikalyq jumystar buǵan deiin elimizde ótýi tiis ulttyq sanaqqa bailanysty keiinge shegerilgen. Endi eldimekenderdi qaita ataý jumystary jandandy.
«Ideologiialyq turǵydan eskirgen eldimeken, kóshelerdi qaita ataý nemese olarǵa respýblikaǵa tanymal, qazaq halqyna belgili tulǵalardyń esimin berý – bizdiń onomastika baǵytyndaǵy jumysymyz. Qazirgi tańda 15 aýyldyq okrýgtiń 30-ǵa tarta aýyly keńestik kósem basshylarynyń atymen atalǵan. Áli de oblysta Lenin, Kirov, Ilich atyndaǵy eldimekender kezdesedi. Ideologiialyq sipatqa sai kelmeitin oblysta 744 kóshe bar. Osy baǵytta aýdandar tarapynan jumystar júrgizilip jatyr», - deidi Erniiaz Sultanov.
Máselen Esil aýdandyq ákimdigi áleýmettik jelidegi óz paraqshalarynda qarasha aiynyń ortasynda Iavlenka eldimekenindegi birneshe kóshe ataýyn ózgertý boiynsha jiyn ótetinin habarlady. Halyq talqysyna Lenin, Ýritskii, Chapaev, Shors, Ordjonikidze, Sovet, Fýrmanov, Kirov, Frýnze, S.Lazo, Býdennyi, Proletar, S.Razina, K.Tsetkin, Vorovskii kósheleriniń atyn aýystyrý máselesi usynylmaq.
«Respýblika tarapynan, Prezident ákimshiligimen kelisilip, respýblikalyq onomastikalyq komissiiada maquldanǵan 345 uly tulǵalardyń tizimi bekitildi jáne 380 tarihi jer-sý ataýlar tizimi bekitildi. Qazir ideologiialyq turǵydan eskirgen aýyl, kóshe, okrýgterdiń ataýyn ózgerterde osy tizimdi basshylyqqa alý qajet», - deidi Erniiaz Sultanov.
Sońǵy ret SQO-da 2018 jyly Maǵjan Jumabaev atyndaǵy aýdanda 5 aýyldyq okrýg pen 3 eldimeken jáne Ýálihanov aýdanynda 1 aýyldyń aty aýystyryldy.
