Soltústik Qazaqstan oblysynda sot spirttik ishimdikke táýeldi áieldiń balalaryn qasyna alý týraly talap-aryzyn qanaǵattandyrmady, dep habarlaidy QazAqparat.
SQO sotynyń málimetinshe, ótken aptada oblystyq sottyń azamattyq ister jónindegi alqasy 53 is pen materialdy qarady, iaǵni bir sýdiaǵa 9 isten kelgen. Onyń ishinde eńbek, kelisimsharttyq daýlar, muragerlik qatynastardaǵy daýlar, zalaldy óteý týraly, memlekettik satyp alý salasynda, memlekettik organdardyń is-áreketteri men sheshimderimen kelispeý, korporativtik, saqtandyrý, salyq daýlary, mámilelerdi jaramsyz dep taný týraly daýlar bar.
Sonyń biri - balalardyń turǵylyqty jerin anyqtaýǵa bailanysty. 6 jáne 8 jastaǵy qyzy bar áiel balalarynyń ózimen birge turýy úshin sotqa aryzdanǵan. Alaida sot onyń talap-aryzyn qanaǵattandyrmady.
«Talapker «Alkogoldi tutynýdan týyndaǵan psihikalyq minez-qulyq buzylystary. Táýeldilik sindromy» diagnozy boiynsha esepte tur. Táýeldilikten arylýdyń oń dinamikasy joq, kez kelgen ýaqytta taǵy da ishimdikke salynýy múmkin. Emdeýden keiin de ol alkogoldi ishýdi jalǵastyrdy. Bul jaǵdaida balalardyń anasymen birge turýy olardyń múddelerin buzady, aýyr saldarǵa ákeledi jáne balalardyń psihologiialyq jaǵdaiyna, olardyń adamgershilik tárbiesi men damýyna teris áser etedi. Sol sebepti sot sheshimi ózgerissiz qaldy, ananyń shaǵymy qanaǵattandyrylmady», - delingen habarlamada.
Sot alqasy talapker alkogolge táýeldilikten tolyq arylǵan jáne esepten shyǵarylǵan jaǵdaida ǵana balalardyń turǵylyqty jeri máselesin jaýapkermen, iaǵni ákesimen birlesip sheshýge quqyly ekenin túsindirdi. Al kelispeýshilikter týyndaǵan jaǵdaida qaitadan sotqa júgine alady.
