Soltústik Qazaqstan oblysynda «inDriver» mobildik qosymshasy arqyly jolaýshy tasyǵan júrgizýshi rýlge esirtki shegip otyrǵany anyqtaldy, dep habarlaidy SQO Politsiia departamenti baspasóz qyzmeti.
Esirtkige elitken kólik júrgizýshisi «Qarasora-2020» jedel-profilaktikalyq is-sharasy aiasynda qolǵa tústi. Esirtki qylmysyna qarsy is-qimyl basqarmasynyń qyzmetkerleri Petropavl qalasynan shyǵyp kele jatqan avtokólikti teksergen. «BMW» rýlinde Ǵ. Músirepov atyndaǵy aýdannyń ortalyǵy Novoishimskoe eldimekeniniń 43 jastaǵy turǵyny bolǵan. Kólik salonynda júrgizýshiden bólek, 3 jolaýshy bolǵan.
Kólikti qaraý kezinde shyntaqqoiǵyshtyń ishinen 2 polietilen paketke salynǵan ósimdik tektes zat alyndy. Esirtki izdeýge mashyqtanǵan Bých atty spaniel it ony birden tapty. Saraptama alynǵan zattyń jalpy salmaǵy 220 gramm esirtki ekenin kórsetti. Kólik júrgizýshisi buǵan deiin de birneshe márte isti bolǵan eken.
Budan bólek, júrgizýshini tekseristen ótkizý barysynda onyń esirtkige elitkeni anyqtaldy. Ol «inDriver» qosymshasy arqyly eki jolaýshyny almastan buryn marihýana shekkenin rastady. Sózine qaraǵanda, esirtkini 2 jyl boiy qoldanyp keledi.
SQO PD Esirtki qylmysyna qarsy is-qimyl basqarmasy bastyǵynyń orynbasary Ivan Terzididiń sózinshe, júrgizýshige qatysty QR Ákimshilik quqyq buzýshylyqtar týraly kodeksiniń 608-baby boiynsha ákimshilik hattama toltyryldy. Ustalǵan adam Petropavl qalasynyń sotymen 15 táýlikke qamaqqa alynyp, kólik basqarý quqyǵynan 7 jylǵa aiyryldy.
Buǵan deiin soltústikqazaqstandyq saqshylar kólikti esirtkilik mas kúide júrgizýdiń úsh deregin anyqtaǵan edi.
