Soltústik Qazaqstan oblysynda Chernobaevka aýylynyń eki turǵyny jaqtyrmaityn tanysynyń 25 tonna shóbin qasaqana órtep jiberdi, dep habarlaidy "Ult aqparat".
SQO Politsiia departamenti baspasóz qyzmetiniń málimetinshe, oqiǵa Ǵabit Músirepov atyndaǵy aýdannyń Chernobaevka eldimekeninde bolǵan. 37 jastaǵy turǵynnyń baqshasynda jatqan 25 tonna shóbi janyp ketti. Kelgen shyǵyn – 600 myń teńgeden asady.
Aýyl turǵyny politsiiaǵa júginip, shóptiń qasaqana órtelgendigi anyqtaldy. Jedel-tergeý toby ýchaskelik politsiia inspektorynyń kómegimen osy iske qatysy bolýy múmkin sol aýdannyń 31 jastaǵy eki turǵynyn ustady. Kúdiktiler jasaǵan qylmystaryn moiyndady. Aitýlarynsha, olar sol kúni spirttik ishimdik ishken. Araqtyń býymen, jaqtyrmaityn tanystaryna ziian keltirmek bolady. Osylaisha baqshada turǵan shópke ot qoiǵan.
Atalǵan derek QR Qylmystyq kodeksiniń «Bótenniń múlkin qasaqana joiý nemese búldirý» baby boiynsha Sotqa deiingi tergep-tekserýdiń biryńǵai tizilimine engizildi. Kúdiktilerge qatysty kelýi týraly mindetteme túrindegi májbúrleý sharasy qoldandy.
«QR QK 202-babynyń 2-bóligi órt qoiý, jarylys jasaý arqyly nemese ózge de jalpy qaýipti tásilmen jasalǵan is-áreketti qarastyrady. Sol kúni úide otbasy músheleri tolyq úide bolǵan. Órt qora-qopsyǵa, úige taraǵan joq. Órt sóndirýshiler órtti sóndirip úlgerdi», - deidi Ǵ.Músirepov atyndaǵy aýdannyń PB bastyǵy Marat Áljanova.
