Soltústik Qazaqstan oblysynda ormanda jidek terip júrgen áiel oqqa ushty. 51 jastaǵy turǵyndy qus atýǵa shyqqan azamat baiqamai atyp tastaǵan, - dep habarlaidy "Ult aqparat" "Astana" telearnasyna silteme jasap.
Quzyrly organdardyń aitýynsha, oqiǵa Jambyl aýdanynyń Baýman aýylynda bolǵan. Oq jábirlenýshiniń keýdesine tiipti.
Prokýratýra dereginshe, oq tigen Altynai Muzdaqbaevany ańshynyń ózi aýrýhanaǵa aparǵan. Alaida aýyr jaraqattanǵan 51 jastaǵy áiel emdeý ornyna jetpei, jolda kóz jumypty.
Bul jaitqa qatysty qylmystyq is qozǵalyp, tergeý jumystary júrgizilip jatyr.
"Bul qylmysty jasaǵan adam anyqtalǵan. Ol óz kinásin moiyndap otyr. QR Qylmystyq protsessýaldyq kodeksiniń 128 babynyń tártibi boiynsha ustalyp, Jambyl aýdandyq ýaqytsha ustaý izoliatoryna qamaldy" - deidi aýdan prokýrory Talǵat Tólegenov.
