Soltústik Qazaqstan oblysynyń bas sanitariialyq dárigerdiń qaýlysyna ózgeris engizildi. 9 qarashadan bastap oblys aýmaǵynda avtobýs qatynasy toqtaidy, dep habarlaidy "Ult aqparat".
SQO Sanitariialyq-epidemiologiialyq baqylaý departamenti baspasóz qyzmetiniń málimetinshe, karantindik shekteýler Petropavl qalasy men Qyzyljar aýdanynda ǵana emes, barlyq oblys aýmaǵynda kúsheitilmek. Jańa qaýly 9 qarasha kúni saǵat 00.00-den bastap kúshine enedi.
Barlyq turǵyndarǵa, sonyń ishinde jasy 65-ten asqandarǵa saǵat 22.00 men 06.00 aralyǵynda dári-dármek satyp alý sekildi asqan qajettilik bolmasa turǵylyqty jerinen ketpeý usynylady.
Oiyn-saýyq, saýda ortalyqtary, saýda úileri dúisenbi-juma kúnderi saǵat 10.00 men 20.00 aralyǵynda ǵana jumys isteidi. Senbi-jeksenbi kúnderi, ishindegi azyq-túlik dúkenderinen basqasy, jumysyn toqtatady. Bul aýmaǵy 500 sharshy metrden asatyn saýda ortalyqtaryna da qatysty. Qurylys dúkenderi senbi-jeksenbi kúnderi jumys isteidi.
Aýmaǵy 500 sharshy metrge deiingi azyq-túlik emes buiymdaryn satatyn dúkenderdiń de jumys kestesinde ózgeris bar, olar senbi-jeksenbiden basqa kúnderi saǵat 8.00-20.00 aralyǵynda ashyq.
Sulýlyq salondary, shashtarazdar, kosmetikalyq qyzmet kórsetetin ortalyqtar senbi-jeksenbi jumys istemeidi.
Qoǵamdyq tamaqtaný oryndary ujymdyq is-sharalar ótkizbesten jáne dúisenbiden jumaǵa deiin jumys ýaqyty saǵat 08.00-den 21.00-ge deiin bekitildi. Zalda 30 orynnan aspaýy kerek, 30 orynnan az nysandar úshin tek 50% ǵana tolýy qajet. Senbi-jeksenbi kúnderi saǵat 08.00-den 21.00-ge deiin tamaqtaný obektileri tutynýshylarǵa ónimderin tek jetkizip berý arqyly jumys isteidi.
Sondai-aq SQO aýmaǵynda oblysishilik avtobýs qatynasy toqtaidy. Avtovokzal, avtostansalardyń jumysy ýaqytsha shekteldi.
