SQO-da 50 jylqy kólge batyp óldi, - dep habarlaidy Tengrinews.kz agenttigi Petropavlovsk.news-ke silteme jasap.
2 jeltoqsanda SQO Aiyrtaý aýdanynyń politsiia bólimine Áljan aýylynda 50 jylqy joǵalǵany týraly habarlama kelip túsken.
Jylqylar SQO Aiyrtaý aýdany Áljan aýylynyń turǵyndaryna tiesili ekeni anyqtaldy. Janýarlar 27 qarashada erkin jaiylymnan joǵalyp ketken.
"Izdeý barysynda joǵalǵan jylqylar muzdyń ishinde qatqan kúiinde Barchi kólinen tabyldy. Aldyn ala boljam boiynsha, jylqylar baqtashy bolmaǵan kezde kóldegi muz ústimen júrgen. Keiin muz jarylyp, sýǵa batyp ketken", - delingen habarlamada.
Bul derek boiynsha Aiyrtaý aýdanynyń politsiia bóliminde tergeý bastaldy.
Qazirgi ýaqytta politseiler bolǵan oqiǵanyń barlyq mán-jaiyn tekserip, naqty qansha janýar ólgenin anyqtap jatyr.
