Soltústik Qazaqstan oblysynda biyl 311 iri qara mal brýtsellezben aýyrdy, qazir olardyń ieleri ótemaqy alýǵa qujattaryn tapsyryp jatyr, dep habarlaidy QazAqparat.
SQO veterinariia basqarmasynyń málimetinshe, Esil aýdanynda naýryz aiynan bastap 124 iri qara mal aýyrsa, Qyzyljar aýdandarynda brýtsellez aýrýynyń 101 jaǵdaiy tirkelgen.
«Brýtsellez anyqtalǵan jaǵdaida mal iesi Zań boiynsha 15 kún ishinde túlikti tólimen birge mindetti túrde sanitarlyq soiýǵa tapsyrýy tiis. Sebebi olar infektsiia taratýshy bolyp tabylady, basqa janýarlarǵa juqtyrýy múmkin. Veterinarlyq qyzmet janýarlardy et kombinatyna deiin tegin jetkizedi. Kásiporyn aýrý maldy jasyna jáne jynysyna qarai satyp alady», - deidi veterinarlyq qyzmet mamandary.
Eger maldyń eti men ishki múshelerinde aýrýǵa bailanysty patologiialyq ózgerister bolsa, mal ielerine ortasha naryq baǵasynyń 30 %-y óteledi.
Et taza bolǵan jaǵdaida on eki saǵattan keiin ol shekteýsiz satýǵa jiberiledi.
«Ótemaqy zań boiynsha belgilengen qujattardyń tolyq paketi bolǵan jaǵdaida ǵana jasalady. Qazirgi ýaqytta 25 iri qara malǵa bailanysty 4 adamnan qujattar qabyldandy. Jalpy somasy 2,1 mln teńge. Ótemaqy tek qazan aiynan bastap qana tólene bastaidy», - deidi veterinarlar.
Mamandardyń aitýynsha, biyl brýtsellezben aýyrǵan mal sany 117 basqa azaiǵan.
