Soltústik Qazaqstan oblysynda koronavirýstyń taralýyna bailanysty taǵy 10 eldi mekende karantin talaptary kúsheitilip, turǵyndardyń júrip-turýy shekteldi, dep habarlaidy "Ult aqparat".
SQO Taýarlar men kórsetiletin qyzmetterdiń sapasy men qaýipsizdigin baqylaý departamenti baspasóz qyzmetiniń málimetinshe, karantindik shekteýler kúsheitilgen eldi mekenderdiń sany 10-ǵa jetti.
9 qazan kúni Býlaev jáne Mamliýtka qalalary karantinge jabylǵan edi.
12 qazan kúni olardyń qataryna Aqjar aýdanynyń Kazanskoe, Leningradskoe eldi mekenderi qosyldy.
14 qazan kúni Shal aqyn aýdanynyń Povozochnoe, al 16 qazan kúni Taiynsha aýdanynyń Kirov jáne Chermoshnianka eldi mekenderinde koronavirýsty juqtyrǵandar sanynyń artýyna bailanysty karantin kúsheitildi.
Sondai-aq Esil aýdanynyń Iavlenka, Pokrovka jáne Chirikovka aýyldarynda 17 qazannan beri turǵyndardyń júrip-turýyna shekteý bar.
«Bul eldi mekenderdiń keibirine sanitarlyq beketter qoiyldy. Jalpy, mundai beketterdi qoiý-qoimaýdy jergilikti shtab pen politsiia sheshedi. Aýdandardyń bas sanitariialyq dárigerleriniń qaýlysy boiynsha nysandar jumys isteidi», - deidi baspasóz mamandary.
SQO-da osy kúnge deiin koronavirýs infektsiiasyn juqtyrýdyń 4309 deregi tirkeldi. 4024 naýqas jazylyp shyqsa, 25-i qaitys boldy.
SQO Densaýlyq saqtaý basqarmasy baspasóz qyzmetiniń málimetinshe, qazir óńirdegi provizorlyq statsionarlarda 146 oryn bar, ol búginde 52% tolyq. Infektsiialyq statsionarlarda 221 jatyn oryn bolsa, 35% naýqastar em alyp jatyr.
Ótken táýlikte oblysta 1040 adamnan PTR-test alynsa, sonyń segizinde qaýipti aýrý rastaldy. Qazirgi kezde naýqastardyń 9-ynyń jaǵdaiy aýyr.
