Premer-Ministriniń orynbasary Roman Skliar orman-dala órtteriniń aldyn alý jáne olardy joiý máseleleri boiynsha tapsyrmalar berdi, dep habarlaidy "Ult aqparat".
29 sáýirde beinekonferentsiia bailanysy rejiminde Qazaqstan Respýblikasy Premer-Ministriniń orynbasary Roman Skliardyń jalpy basshylyǵymen Tótenshe jaǵdailardyń aldyn alý jáne joiý jónindegi vedomstvoaralyq memlekettik komissiianyń otyrysy ótti. Tótenshe jaǵdailar ministri Iýrii Ilinniń tóraǵalyǵymen ótken komissiia jumysyna ortalyq memlekettik organdardyń basshylary, ákimderdiń orynbasarlary, óńirlerdiń TJD bastyqtary qatysty.
Roman Skliar azamattardyń ómir qaýipsizdigin qamtamasyz etý, múlikti qorǵaý memlekettiń basym mindeti ekenin atap ótip, kúshter men quraldardyń jedel den qoiýǵa daiyndyǵyn qamtamasyz etýdi, sondai-aq aviatsiiany tartýdy qarastyrýdy tapsyrdy.
Múddeli memlekettik organdarǵa ákimdiktermen birlesip tabiǵat qorǵaý jáne orman mekemelerin órt-tehnikalyq jaraqtarmen jabdyqtaý, orman órt sóndirý stantsiialary men baqylaý munaralaryn salý jónindegi jol kartasyn ázirleý tapsyryldy.
Qazirgi órt qaýipti kezeńge qatysty Iu. Ilin sany 43 myń adam, 9 myńnan astam tehnika, sý aǵyzatyn qurylǵylary bar 10 tikushaq jáne iri órt bolǵan jaǵdaida 46 órt sóndirý poiyzy bar kúshter men quraldardyń daiyndyǵy týraly habarlady. 4 myńnan astam erikti qurylym quryldy.
Ákimdikter 400-den astam órt sóndirý beketterin qurdy, olar 1273 eldi mekendi qorǵaýdy qamtamasyz etedi.
Qabyldanǵan sharalar týraly ekologiia, geologiia jáne tabiǵi resýrstar vitse-ministri S. Brekeshev, Órtke qarsy qyzmet komitetiniń tóraǵasy N. Derbisov, birqatar oblys ákimderiniń orynbasarlary baiandady.
