Foto: t.me/KZgovernment
Premer-ministrdiń birinshi orynbasary Roman Skliar Ekibastuzdaǵy tótenshe jaǵdai týraly málimdemesin túsindirdi, - dep habarlaidy Tengrinews.kz portaly.
Vitse-premer Ekibastuzdaǵy jaǵdaiǵa qatysty búkil qalada apat boldy deý durys bolmaitynyn túsindirdi. Onyń aitýynsha, bul jekelegen shaǵynaýdandar men jekelegen turǵyndarǵa tóngen apat.
"Bul jekelegen aýdandardaǵy apat. Ekibastuzda 689 kópqabatty úi bar, onyń 70-inde segiz kúnge deiin jylý bolmady", - dedi Roman Skliar.
Sonymen qatar, vitse-premerdiń aitýynsha, Ekibastuzda 5200 jeke turǵyn úi bolsa, onyń 4500-i ortalyqtandyrylǵan jylýmen qamtamasyz etilgen. Skliardyń aitýynsha, bul turǵyn úilerdiń 150-ge jýyǵy jylýsyz qalǵan.
"Sondyqtan, menen: "Jyly qonaqúide turǵan shyǵarsyz..." dep suraǵanda, aitpaqshy, Ekibastuzda áriptesterim turǵan qonaqúiler kóp. Bul aýqymdy kommýnaldyq apat, biraq búkil qala apaty emes. Jylýshylar stantsiiany qaita iske qosa aldy, bastapqyda jylýsyz qalǵan 149 úidiń 79-y birinshi kúni iske qosyldy, tek 70 úide ǵana bul jumystar júrgizildi. Kópshilikte búkil qala aiaz qursaýynda qalyp, jylý, jaryq bolmady degen qate túsinik qalyptasty", - dep túiindedi sózin Premer-ministrdiń orynbasary.
