Nur-Sultannyń Esil aýdandyq sotynda memlekettik aýrýhanalarǵa dári-dármek jetkizetin biryńǵai distribiýtor «SQ-Farmatsiia» kompaniiasynyń burynǵy basshysy Berik Sháriptiń ústinen qozǵalǵan is boiynsha ekinshi sot otyrysy aiaqtaldy, dep habarlaidy Azattyq Rýhy tilshisi.
Ekinshi sot otyrysynda aiyptalýshynyń advokattary sotqa bas kýáger retinde jábirlenýshi taraptan Qazaqstannyń Densaýlyq saqtaý ministri Aleksei Tsoidy shaqyrýǵa ótinishhat berdi. Sebebi jábirlenýshi taraptyń advokaty Serjan Baýyrjanuly sýdia men advokattar tarapynan qoiylǵan birneshe suraqqa tolyqqandy jaýap bere almady.
Ótken sot otyrysynda prokýror Dastan Kúperbaev «SQ-Farmatsiia» eks-basshysynyń zańsyz áreketteri saldarynan Qazaqstannyń eki myńnan astam dárigeri koronavirýsty juqtyrdy dep málimdegen bolatyn. Biraq búgingi sot otyrysyna prokýror densaýlyq jaǵdaiyna bailanysty qatyspady.
«QPK 99 reti boiynsha sottan Aleksei Vladimirovich Tsoidy kýáger retinde shaqyrýdy suraimyn. Ótinishhat nemen bailanysty deseńiz, jábirlenýshi taraptyń ókili qoiylǵan júz suraqtyń jartysyna jaýap bere almady. Ol kóp nárseden habary joq ekenin aitady. Biz jan-jaqty zertteý barysynda barlyq taǵylǵan aiyptarǵa kóz jetkizý kerekpiz», - dedi Berik Sháriptiń tórt qorǵaýshysynyń biri Erlan Mákenov.
Sýdia Qanat Bisembaev jábirlenýshi taraptyń advokaty kelesi sot otyrysynda da suraqtarǵa qanaǵattanarlyqtai jaýap bermeitin bolsa, Densaýlyq saqtaý ministrliginen jaýapty mamandy aldyratynyn aitty.
«Men jábirlenýshi taraptyń ókiline qoiǵan suraqtaryma daiyndalýdy tapsyrdym. Qajet bolsa, Oralov, siz ministrliktiń qurylymdyq bólimsheleriniń basshylarynan jaýap alýǵa ótinishhat bere alasyz, sosyn biz olardy sotqa shaqyra alamyz. Eger sot tiisti jaýap ala almai, ministrdi shaqyrý qajet dep tapsa onda men advokattyń ótinishhatyna oralamyn. Onyń ústine kýágerler tiziminde eks-ministr Birtanov bar. Biz bul suraqtardy oǵan da qoiamyz»,- dedi sýdia.
