«SQ-Farmatsiia» JShS-nyń basqarma tóraǵasy Erhat Esqaliev óńirlerde dári-dármek qoryna qatysty monitoring júrgizilgenin aitty, dep habarlaidy QazAqparat tilshisi.
«Biylǵy qazan aiynyń ekinshi onkúndiginen bastap Sybailas jemqorlyqqa qarsy qyzmet Nur-Sultan, Almaty, Shymkent qalalarynda, sondai-aq barlyq 14 oblys ortalyqtarynda jurtshylyqtyń, BAQ-tyń qatysýymen dárilik zattardyń, onyń ishinde 2 ailyq tómendetilmeitin qordyń bolýyna monitoring júrgizdi. Meditsina qyzmetkerlerine arnalǵan jeke qorǵaný quraldaryn jergilikti atqarýshy organdar Úkimet rezerviniń qarajatynan derbes satyp aldy jáne 3 ailyq qor quryldy. Jergilikti atqarýshy organdar turaqtandyrý qorlary qarajatynan qosymsha jeke qorǵaný quraldaryn satyp aldy», - dep túsindirdi E. Esqaliev Ortalyq kommýnikatsiialar qyzmetinde.
Sonymen qatar, Úkimet gýmanitarlyq kómek aiasynda alynǵan bir ret qoldanylatyn 400 myń qorǵanysh kostiými kóleminen jeke qorǵaný quraldary rezervin qurý máselesin qosymsha pysyqtady. Bul kólem koronavirýstyń yqtimal jańa tolqyny jaǵdaiynda paidalaný úshin qosymsha rezerv retinde Biryńǵai distribiýtordyń 4 HABynda saqtalatyn bolady.
«Gýmanitarlyq kómekti bólý máselesine toqtalǵym keledi. Gýmanitarlyq júkterdi kidirtýge jol bermeý jónindegi shuǵyl is-sharalardy júrgizý aiasynda elge jiberiletin gýmanitarlyq júk boiynsha qujattar jiberiletin kezde aldyn ala habardar etý modeli ázirlenip, engizildi. Osyǵan bailanysty gýmanitarlyq kómek máselelerine jetekshilik etetin jaýapty tulǵalardyń (QR DSM, SIM, keden qyzmeti, aviakólik kompaniialary, áýejailar men ákimdikter) tizimi qalyptastyryldy. Jurtshylyq pen Sybailas jemqorlyqqa qarsy qyzmet ókilderiniń qatysýymen dári-dármekterdi bólýdiń ashyq monitoringi qamtamasyz etildi. Gýmanitarlyq júkterdiń kelýi, sondai-aq óńirlerge meditsinalyq uiymdarǵa deiin jóneltý jónindegi barlyq aqparat jariialanady jáne «SQ-Farmatsiia» saitynda kún saiyn jańartylyp otyrady», - dedi Erhat Esqaliev.
