Atyraý oblysynyń Óńirlik kommýnikatsiialar qyzmetiniń habarlaýynsha, QR Premer-ministriniń orynbasary Atyraý oblystyq perinataldy ortalyǵyna baryp, dárigerlermen tildesti.
Búginde bul meditsinalyq mekemede 434 qyzmetker qyzmet atqarady, onyń ishinde 62 dáriger, 215 orta býyn meditsina qyzmetkeri bar. Ortalyqta ginekologiia bólimshesi, bosanatyn bólme, keńes berý-diagnostikalyq bólimshesi, jańa týǵan sábilerdiń patologiiasy, bosanýǵa deiingi, kúndizgi jáne bosanýdan keiingi, qabyldaý men ońaltý bólimderi qyzmet atqarady.
Berdibek Saparbaev Atyraý oblystyq densaýlyq saqtaý basqarmasynyń basshysy Mánshúk Aimurzievadan jáne qoǵamdyq densaýlyqty qorǵaý departamenti basshysynan aimaqtaǵy sábi óliminiń joǵary bolýy sebepterine túsinik berýdi ótindi.
«Bala men ana óliminiń máselesi - kún tártibindegi qatań baqylaýdaǵy ózekti másele. Jaǵdai múldem ýshyǵyp ketti deýge bolmas. Toqsan saiyn ortalyqtyń mamandary otandyq jáne sheteldik meditsina salasynyń bilikti qyzmetkerlerinen dáris alyp keledi. Mysaly, aǵymdaǵy jyldyń shilde aiynda 13 dáriger-neonatolog Nur-Sultan qalasyndaǵy meditsinalyq ortalyqtardyń birinen biliktilikti arttyrý kýrstarynan ótti. Sonymen qatar, kásibi shyńdalý úshin perinataldy ortalyqtyń dárigerleri Litva qalasyndaǵy oqýǵa barady. Biyldyń ózinde ortalyqtyń qondyrǵylarmen jabdyqtalýy úshin 600 mln. teńge bólindi», - dedi Mánshúk Aimurzieva.
Qalyptasqan jaǵdaidy ońtailandyrý úshin Berdibek Saparbaev shuǵyl sharalardy qolǵa alýdy tapsyrdy. Budan soń, vitse-premer perinataldy ortalyqtyń qyzmetkerine málimdeme jasady.
«Siz Gippokrat antyn berdińizder, sondyqtan, bir minýtqa da óz jumystaryńyzdy tastaýǵa, adamdardy emdeýdi toqtatýǵa bolmaidy ǵoi! Óz qyzmetterińizdi adal atqarýlaryńyzdy ótinemiz! Perinataldy ortalyqtaǵy jaǵdaidy jeke qatań baqylaýǵa alýdy Atyraý oblysynyń basshylyǵyna tapsyramyn. Onyń ishinde, meditsinalyq mekemedegi anyqtalǵan kemshilikterdi joiý kerek. Qylmystyq isti tergeý zań talaptaryna sai júrgiziledi, jumys barysyna kedergi keltirmeidi», - dedi Berdibek Saparbaev meditsina salasynyń qyzmetkerlerine.
Sonymen qatar, vitse-premer densaýlyq saqtaý basqarmasy basshysynyń jaýapkershiligi jónindegi máseleni qarap, tiisti qadaǵalaýdyń bolmaǵany úshin qoǵamdyq densaýlyqty qorǵaý departamentiniń basshylyǵyna qatysty shara qoldanýdy Densaýlyq saqtaý ministrligine tapsyrdy.
Densaýlyq saqtaý basqarmasynyń aqparaty boiynsha, táýligine munda 25-35 sábi dúniege keledi eken, dárigerler kúnine 8-den 12 ota jasaityn kórinedi.
Aita keteiik, qańtar-qazan ailary aralyǵynda Atyraý oblysynda 12403 bala dúniege kelgen, osylaisha, sońǵy eki jyldaǵy týý kórsetkishi 500 sábige deiin ósken.
