Foto: ashyq derekkóz
Quqyq qorǵaý organdary azamattarǵa qońyraý shalyp, ózin memlekettik organnyń qyzmetkeri retinde tanystyratyn alaiaqtardyń áreketi jiilegenin eskertti, dep habarlaidy Ult.kz.
Alaiaqtar «Siz salyq deklaratsiiasyn ýaqytynda tapsyrmaǵansyz» degen syltaýmen senimge kirip, bank shottaryńyz buǵattalýy múmkin dep qorqytady. Keiin máseleni úsh kún ishinde «sheshý kerek» degen jeleýmen qysym kórsetedi.
Olar azamattardan «jeke basyńyzdy rastaý qajet» dep, SMS arqyly kelgen kodty aitýyn suraidy.
Kodty alǵan soń, qylmyskerler jábirlenýshiniń banktik shottaryna qol jetkizip, aqshany zańsyz iemdenedi.
Politsiianyń eskertýi:
- Memlekettik organ ókilderi mundai mazmundaǵy qońyraý shalmaidy jáne eshqashan SMS-kodtar men rastaý derekterin suramaidy;
- Eshqashan bógde adamdarǵa SMS-kodtardy, bank kartasynyń nómiri men parolin, jeke derekterińizdi bermeńiz;
- Eger kúdik týdyratyn qońyraý alsańyz, áńgimeni dereý toqtatyp, «102» nómirine habarlasyńyz.
