Siriiadaǵy ot pen oqtyń ortasynan Qazaqstanǵa qaitarylǵan balalardyń kúni ne bolmaq? Jas jetkinshekterdiń ary qaraiǵy ómiri jaily QR Ulttyq qaýipsizdik komitetiniń departament basshysy Baqytbek Rahymberdiev aityp berdi, dep habarlaidy QazAqparat tilshisi.
«Qaita oralǵan balalardyń keibiri Siriiada dúniege kelgen. Olardy qujattandyrý máselesin Syrtqy ister ministrligi men jergilikti atqarýshy organdar sheshetin bolady. Bul rásim bizdiń zańdarymyzben maquldanǵandyqtan, eshqandai kedergi joq», - dedi ol QR SIM-de ótken baspasóz máslihatynda.
Sonymen qatar, UQK ókili barlyq derlik balanyń ákeleri sol jaqta kóz jumǵanyn, balalar analarymen birge elge oralǵanyn atap ótti.
«Tipti bir balanyń anasy áli de sol jaqta qalǵan. Al balanyń ózi munda jalǵyz. Qaita oralǵan azamattar - Astana jáne Almaty qalalarynyń, sondai-aq Almaty, Batys Qazaqstan, Qaraǵandy jáne Mańǵystaý oblystarynyń turǵyndary», - deidi Baqytbek Rahymberdiev.
UQK departament basshysy sondai-aq, olardyń barlyǵy da 2012-2015 jyl aralyǵynda Siriiaǵa jetkizilgenin atap ótti.
«Qazir 7 azamattyń (6 er adam men bir áiel) terroristik uiymdardyń qyzmetine aralasýyna bailanysty qylmystyq is júrgizilip jatyr», - dedi Baqytbek Rahymberdiev.
Eske sala ketsek, buǵan deiin QR Ulttyq qaýipsizdik komitetiniń departament basshysy Baqytbek Rahymberdiev «Jýsan» operatsiiasy boiynsha Siriiadan elimizge qaitarylǵan azamattardyń jeteýiniń ústinen qylmystyq is qozǵalǵanyn habarlaǵan edi. Onyń aitýynsha, UQK-da Siriiadan qashpaq bolǵan birneshe qazaqstandyqtyń ólim jazasyna kesilgeni týraly málimetter bar.
