Siriiadan qaitarylǵan adamdardyń lańkestik qylmystarǵa qatysy barlary jazaǵa tartylady. Bul týraly «Jýsan-2» operatsiiasyna qatysty ótken baspasóz máslihatynda QR Syrtqy ister ministriniń orynbasary Erjan Ashyqbaev málim etti, dep habarlaidy QazAqparat tilshisi.
«7-9 mamyrda áskeri qaqtyǵys bolǵan aimaqtardan 231 qazaqstandyq elge qaitaryldy. Olardyń ishinde 16 er adam, 59 áiel jáne 156 bala bar. Bul gýmanitarlyq operatsiia birinshiden qarýly shielenis aýmaqtarynda bolǵan bizdiń azamattarymyzdy qutqarýǵa, sondai-aq olardyń balalaryna Qazaqstan Respýblikasynyń tolyqqandy azamattary retinde beibit ómir súrýge múmkindik berýdi kózdedi», - dep toqtaldy E. Ashyqbaev.
Onyń sózine qaraǵanda, atalǵan adamdardyń arasynda lańkestik qylmystarǵa qatysy barlar jazaǵa tartylady.
«Lańkestik is-qimyldarǵa jáne zańsyz jaýyngerlik áreketterge qatysqandarǵa toqtalsaq, qylmystarǵa qatystylyǵy dáleldengen jaǵdaida, olar QR zańnamasyna sáikes qylmystyq jaýapkershilikke tartylady. Bul gýmanitarlyq operatsiia AQSh-tyń qoldaýymen júzege asyryldy, sondai-aq bul jobada Siriia demokratiialyq kúshteriniń mańyzdy rólin atap ótken jón», - dedi ministrdiń orynbasary.
Sondai-aq, Siriiadan qaitarylǵan adamdardyń birazy tólqujattaryn joǵaltyp alǵan.
«Qazaqstandyqtardyń birqatary ózderiniń tólqujattaryn joǵaltqan. Balalardyń basym bóligi budan buryn ILIM/DAISh baqylaýyndaǵy aimaqtardy týǵan bolatyn. Syrtqy ister ministrligi jáne shet elderdegi mekemeler operatsiia barysynda konsýldyq -quqyqtyq ári logistikalyq qoldaý kórsetti», - dedi E. Ashyqbaev.
Onyń sózine qaraǵanda, QR SIM jáne Ulttyq qaýipsizdik komiteti búkil jumysty múddeli ortalyq jáne jergilikti memorgandar, sondai-aq úkimettik emes uiymdarmen tyǵyz úilestirý arqyly ótkizdi.
«Endi deradikalizatsiialaý jáne saýyqtyrý máselelerine erekshe kóńil bóle otyryp, qaityp kelgen áielder men balalardy beiimdeý ári qaita áleýmettendirý kezeńi bastalyp otyr», - dedi ministrdiń orynbasary.
Budan buryn habarlanǵandai, jaqynda Siriiadan 231 Qazaqstan azamatynyń elge jetkizilýine bailanysty QR Prezidenti Qasym-Jomart Toqaev málimdeme jasady.
«Meniń tapsyrmam boiynsha 7 jáne 9 mamyr kúnderi Siriiadan 231 Qazaqstan azamaty elge jetkizildi, onyń 156-sy - balalar, deni mektep jasyna deiingiler, sonyń ishinde 18-i - jetim balalar. Bul aýqymdy gýmanitarlyq aktsiia - Tuńǵysh Prezident - Elbasy Nursultan Nazarbaevtyń tapsyrmasymen biyl qańtar aiynda júrgizilgen «Jýsan» operatsiiasynyń jalǵasy», - delingen Memleket basshysynyń málimdemesinde.
