QR Ulttyq qaýipsizdik komitetiniń departament basshysy Baqytbek Rahymberdiev lańkesterdiń otandastarymyzdy qalai aldaitynyn aityp berdi, dep habarlaidy QazAqparat tilshisi.
«Tartatyndardyń deni sheteldikter. Ásirese internet arqyly azamattarymyzben bailanysa bastaǵan. Bul nasihat áleýmettik jelilerde de qyzý júrgizilgen. Olar ómirdiń ádil bolatynyn, barlyq dini erejeler saqtalatynyn aityp, adamdardy aldap otyrǵan», - dedi ol Qazaqstan Respýblikasy Syrtqy ister ministrliginde ótken baspasóz máslihatynda.
Baqytbek Rahymberdievtiń aitýynsha, aldanyp shaqyrylǵan qazaqstandyqtar sol jerge barǵannan keiin shyndyǵynda jaǵdaidyń múlde basqa ekendigine, eshqandai ádildiktiń joqtyǵyna kóz jetkizgen.
«Onda musylmandar musylmandarǵa qarsy soǵysyp jatyr. Iaǵni, ártúrli toptar bir-birimen qyrylysýda. Ol jaqqa bir barǵannan keiin qaita shyǵý múmkin emes dese de bolady. Óitkeni, ondai áreket baiqalǵan jaǵdaida adamdar ólim jazasyna deiin jazalanady. Bizdiń azamattardyń qashpaq bolǵany úshin ólim jazasyna kesilgeni týraly málimetter bar», - deidi Baqytbek Rahymberdiev.
Aita ketsek, keshe Memleket basshysy Nursultan Nazarbaev Siriiadan Qazaqstan azamattaryn evakýatsiialaý boiynsha gýmanitarlyq operatsiiaǵa bailanysty málimdeme jasaǵan bolatyn. Memleket basshysy atap ótkendei, 6 qańtarda quqyq qorǵaý organdary men Syrtqy ister ministrligi júrgizgen gýmanitarlyq shara nátijesinde Siriiadan Qazaqstannyń 47 azamaty, sonyń ishinde 30 bala elge qaitaryldy.
Al búgingi baspasóz máslihatynda QR Syrtqy ister vitse-ministri Erjan Ashyqbaev «Jýsan» operatsiiasynan keiin de qaqtyǵys aimaqtarynda júrgen qazaqstandyqtardy Otanyna qaitarý jumysy jalǵasatynyn málim etken edi.
