QR Syrtqy ister vitse-ministri Erjan Ashyqbaev «Jýsan» operatsiiasynan keiin de qaqtyǵys aimaqtarynda júrgen qazaqstandyqtardy Otanyna qaitarý jumystary jalǵasatynyn málim etti, dep habarlaidy "Ult aqparat".
«Jýsan» operatsiiasy tikelei Elbasynyń tapsyrmasymen oryndalǵan jáne bul týraly keshe arnaiy málimdemeni estidińizder. Elbasy aitqandai, Qazaqstan óziniń azamattaryna árdaiym qoldaý kórsetedi. Bul gýmanitarlyq operatsiia, eń aldymen, Elbasymyzdyń halyqaralyq arenadaǵy joǵary bedeliniń jáne elimizdiń beibitshilik bastamalary, qaǵidattary negizinde jasalǵan bolatyn», - dedi Erjan Ashyqbaev SIM-de BAQ ókilderi úshin ótken baspasóz máslihatynda.
Onyń aitýynsha, Qazaqstan Siriiadaǵy janjaldy toqtatý jáne sol elde beiitshilik pen turaqtylyqty ornatý protsesine belsendi atsalysyp keledi. Siriia boiynsha Astana protsesi sheńberinde sońǵy eki jyldyń ishinde kelissózderdiń 11 raýndy Astanada ótkizilgen bolatyn. Atalǵan kelissózderdiń arqasynda Siriianyń kóptegen aimaqtarynda qantógis toqtatylyp, beibitshilik ornaǵan.
«Halyqaralyq terrorizmmen kúresý bizdiń BUU Qaýipsizdik keńesi sheńberindegi abyroimen aiaqtaǵan qyzmetimizde de erekshe oryn alǵan bolatyn. Qazaqstan Respýblikasy BUU Qaýipsizdik keńesiniń 2017 jylǵy 21 jeltoqsanda qabyldanǵan 23-96 qararyn tolyǵymen qoldap, onyń aiasynda qyzmet atqaryp keledi. Atalǵan qarar BUU múshe memleketterine sheteldik terrorister tarapynan qaýip-qaterlerdi anyqtap, qarsy turýǵa qolǵabys etýdi, ásirese Siriia jáne Irakta qaqtyǵys bolyp jatqan aimaqtardan qaityp oralǵan terroristermen kúresýge baǵyttalǵan. Ótkizilgen operatsiia tolyǵymen gýmanitarlyq sarynda. Ony uiymdastyrýǵa jáne sátti ótkizýge Qazaqstannyń birqatar memlekettik organdarynyń ókilderi belsene atsalysty. SIM tarapynan áriptesterimizge rizashylyq bildiremiz», - dedi ol.
Erjan Ashyqbaev sonymen birge, QR SIM kóptegen shet memleketter jáne halyqaralyq uiymdarǵa alǵys bildiretinin aityp ótti.
«Olarmen diplomatiialyq deńgeide, arnaiy qyzmetter arasynda kelissózdermen birlesken is-sharalar atqarylyp keledi. Qazaqstandyqtardy, ásirese, Elbasy keshe aityp ótkendei, jas balalardy elge qaitarý jumystary jalǵasyn tabady. Biz bul maqsat boiynsha shet memlekettermen jáne halyqaralyq uiymdarmen, azamattyq qoǵam ókilderimen tyǵyz bailanysta jumys isteimiz», - dep túidi vitse-ministr.
Eske sala ketsek, keshe Memleket basshysy Nursultan Nazarbaev Siriiadan Qazaqstan azamattaryn evakýatsiialaý boiynsha gýmanitarlyq operatsiiaǵa bailanysty málimdeme jasaǵan bolatyn. Memleket basshysy atap ótkendei, 6 qańtarda quqyq qorǵaý organdary men Syrtqy ister ministrligi júrgizgen gýmanitarlyq shara nátijesinde Siriiadan Qazaqstannyń 47 azamaty, sonyń ishinde 30 bala elge qaitaryldy.
