UQK Siriiadaǵy soǵysta qansha Qazaqstan azamatynyń qaza tapqany týraly derekpen bólisti.
Ulttyq qaýipsizdik komitetiniń (UQK) Azattyq agenttigine bergen resmi jaýabyndaǵy derek boiynsha, Siriia men Irakta soǵys bastalǵaly Taiaý Shyǵysqa 800-ge jýyq Qazaqstan azamaty ketken. Olardyń kóbi – balalar.
- Shildedegi jaǵdai boiynsha, Siriia men Iraktaǵy halyqaralyq terroristik uiymdarda qazaqstandyq 120 er adam, 250-den astam áiel jáne 500 kámeletke tolmaǵan bala bar, - dep jazylǵan UQK jaýabynda.
QANShA QAZAQSTANDYQ ELINE ORALDY?
Astana Irak pen Siriiadaǵy soǵysta barlyǵy qansha qazaqstandyqtyń qaza tapqanyn bilmeidi. Ulttyq qaýipsizdik komitetinde tek Siriiadaǵy halyqaralyq terroristik uiymdar jaǵynda soǵysqan 260-tan astam qazaqstandyqtyń qaza bolǵany týraly málimet bar.
UQK deregi boiynsha, qarýly qaqtyǵysqa zańsyz qatysqany úshin Siriiada 60-qa jýyq, Irakta shamamen 20 Qazaqstan azamaty qamaýda otyr.
Astana qazir quqyq qorǵaý jáne memlekettik organdarmen birigip, urys aimaqtaryna ketken qazaqstandyqtardy elge qaitarý úshin jumys istep jatqanyn habarlady.
UQK dereginshe, Siriiadaǵy áskeri qaqtyǵys bastalǵaly 112 qazaqstandyq (61 er jáne 51 áiel) elge qaitarylǵan. Al budan bólek halyqaralyq terroristik uiymdardyń lagerleri men bazalarynan Qazaqstanǵa qaitaryldy delingen balalardyń sany - 81.
Al biyl naýryzda UQK tóraǵasynyń orynbasary Nurǵali Bilisbekov Astanadaǵy jýrnalisterge arnalǵan jiynda Siriiadan 125 qazaqstandyqtyń oralǵanyn, 57 adam qamaýda otyrǵanyn, qalǵandarynyń baqylaýda ekenin aitqan.
UQK soǵys aimaqtarynan qaityp kelgen adamdardy ońaltý sharalaryn júzege asyryp jatqanyn da málimdedi. Bul sharalar úshin Qazaqstanda ońaltý ortalyqtary ashylǵan.
Qazaqstan azamattarynyń Siriia men Irakqa ketkeni týraly alǵash ret 2013 jyly aityla bastaǵan. Osy jyly kúzde Irak pen Siriiadaǵy qarýly janjalǵa islamshyl radikaldar jaǵynda qatysýǵa Qazaqstannan barǵan "150 jihadshy" týraly video taraǵan edi.
Keiin Taiaý Shyǵystaǵy soǵys aimaǵynda júrip qaza tapqan qazaqstandyqtar týraly aqparat da jiilegen. Olardyń keibiriniń artynda bala-shaǵasy qalǵan. Qazaqstannan Siriia men Irakqa ketken balalaryn qaitarý maqsatymen ata-analar komiteti de qurylǵan. Kei ata-ana tipti Siriiaǵa balasyn izdep barǵanymen, olardy elge qaitýǵa kóndire almai oralǵan.
Bir jyl buryn, iaǵni 2017 jyldyń shildesinde Túrkiianyń Ishki ister ministrligi «Kitap» dep atalatyn baiandama jariialap, 1941 Qazaqstan azamatynyń Túrkiia arqyly Siriiaǵa ótpek bolǵanyn habarlaǵan. Stambýl jariialaǵan baiandamada Qazaqstan azamattary qaqtyǵys aimaǵyna kirýge jii talpynatyn 10 el qatarynda atalǵan.
Ótken jyly qarashada Qazaqstan Syrtqy ister ministrligi Qazaqstannyń Oral qalasynyń turǵyny - 1988 jyly týǵan áiel men onyń tórt balasy Siriiadaǵy soǵys aimaǵynan Sheshenstan astanasy Groznyiǵa arnaiy reispen bir top adammen birge jetkizilgeni týraly habarlaǵan.
Qazaqstan 2015 jyly kúzde DAISh uiymyn "terroristik top" dep tanyǵan.
